Iran Israel War: ਈਰਾਨ ਦੀਆਂ 90% ਮਿਜ਼ਾਈਲਾਂ ਸਹੀ ਨਿਸ਼ਾਨੇ 'ਤੇ ਆਈਆਂ, ਇਜ਼ਰਾਈਲ 'ਚ ਕਿੰਨੀਆਂ ਮੌਤਾਂ, ਕਿੰਨਾ ਨੁਕਸਾਨ ਹੋਇਆ?
Iran Israel War: ਈਰਾਨ ਨੇ ਮੰਗਲਵਾਰ (1 ਅਕਤੂਬਰ) ਦੀ ਸ਼ਾਮ ਨੂੰ 'ਆਪ੍ਰੇਸ਼ਨ ਟਰੂ ਪ੍ਰੋਮਿਸ 2' ਦੌਰਾਨ ਇਜ਼ਰਾਈਲ 'ਤੇ ਲਗਭਗ 200 ਬੈਲਿਸਟਿਕ ਮਿਜ਼ਾਈਲਾਂ ਦਾਗੀਆਂ। ਇਸ ਸਾਲ ਅਪ੍ਰੈਲ ਵਿੱਚ ਵੀ ਇਰਾਨ ਤੋਂ ਮਿਜ਼ਾਈਲ ਹਮਲਾ ਹੋਇਆ ਸੀ, ਇਹ ਹਮਲਾ ਹੋਰ ਵੀ ਵੱਡਾ ਅਤੇ ਸਟੀਕ ਸੀ। ਆਮ ਤੌਰ 'ਤੇ ਦੁਸ਼ਮਣ ਦੀਆਂ ਮਿਜ਼ਾਈਲਾਂ ਨੂੰ ਇਜ਼ਰਾਈਲ ਦੇ ਖੇਤਰ ਵਿੱਚ ਡਿੱਗਣ ਤੋਂ ਪਹਿਲਾਂ ਹੀ ਨਸ਼ਟ ਕਰ ਦਿੱਤਾ ਜਾਂਦਾ ਹੈ। ਪਰ ਇਸ ਵਾਰ ਇਰਾਨ ਦਾ ਦਾਅਵਾ ਹੈ ਕਿ ਉਸ ਦੀਆਂ 90 ਫ਼ੀਸਦੀ ਮਿਜ਼ਾਈਲਾਂ ਆਪਣੇ ਨਿਸ਼ਾਨੇ ਤੱਕ ਪਹੁੰਚਣ ਵਿੱਚ ਸਫ਼ਲ ਰਹੀਆਂ ਹਨ।
ਇਜ਼ਰਾਈਲ ਡਿਫੈਂਸ ਫੋਰਸ ਦੇ ਬੁਲਾਰੇ ਡੇਨੀਅਲ ਹਾਗਰੀ ਨੇ ਕਿਹਾ ਹੈ ਕਿ ਈਰਾਨ ਨੇ ਇਜ਼ਰਾਈਲ 'ਤੇ 180 ਤੋਂ ਜ਼ਿਆਦਾ ਬੈਲਿਸਟਿਕ ਮਿਜ਼ਾਈਲਾਂ ਦਾਗੀਆਂ ਹਨ। "ਈਰਾਨ ਦੁਆਰਾ ਇਹ ਹਮਲਾ ਮੱਧ ਇਜ਼ਰਾਈਲ ਅਤੇ ਦੱਖਣੀ ਇਜ਼ਰਾਈਲ ਵਿੱਚ ਹੋਇਆ ਸੀ।"
IDF ਦੇ ਬੁਲਾਰੇ ਨੇ ਕਿਹਾ ਕਿ ਈਰਾਨ ਦੀਆਂ ਜ਼ਿਆਦਾਤਰ ਮਿਜ਼ਾਈਲਾਂ ਨੂੰ ਇਜ਼ਰਾਈਲੀ ਏਅਰ ਡਿਫੈਂਸ ਅਤੇ ਅਮਰੀਕੀ ਸਹਿਯੋਗੀ ਰੱਖਿਆ ਦੁਆਰਾ ਰੋਕਿਆ ਗਿਆ ਹੈ।
ਇਜ਼ਰਾਇਲੀ ਫੌਜ ਨੇ ਦੇਰ ਰਾਤ ਜਾਣਕਾਰੀ ਦਿੱਤੀ ਕਿ ਈਰਾਨ ਦਾ ਹਮਲਾ ਪੂਰਾ ਹੋ ਗਿਆ ਹੈ, ਪਰ ਉਨ੍ਹਾਂ ਨੇ ਜਾਨੀ ਨੁਕਸਾਨ ਬਾਰੇ ਕੋਈ ਠੋਸ ਜਾਣਕਾਰੀ ਨਹੀਂ ਦਿੱਤੀ। ਇਜ਼ਰਾਈਲ ਦੇ ਸਿਹਤ ਮੰਤਰਾਲੇ ਨੇ ਵੀ ਇਸ ਬਾਰੇ ਕੋਈ ਬਿਆਨ ਨਹੀਂ ਦਿੱਤਾ ਹੈ। ਜਦੋਂ ਕਿ ਟਾਈਮਜ਼ ਆਫ ਇਜ਼ਰਾਈਲ ਦੀ ਖਬਰ ਮੁਤਾਬਕ ਇਸ ਹਮਲੇ 'ਚ ਇਕ ਫਲਸਤੀਨੀ ਦੀ ਮੌਤ ਹੋ ਗਈ ਅਤੇ ਦੋ ਇਜ਼ਰਾਇਲੀ ਜ਼ਖਮੀ ਹੋ ਗਏ।
ਇਜ਼ਰਾਈਲੀ ਹਵਾਈ ਰੱਖਿਆ ਪ੍ਰਣਾਲੀ ਈਰਾਨੀ ਮਿਜ਼ਾਈਲਾਂ ਨੂੰ ਹਵਾ ਵਿੱਚ ਨਸ਼ਟ ਕਰ ਰਹੀ ਹੈ।
ਇਸ ਹਮਲੇ 'ਚ ਮਰਨ ਵਾਲੇ ਨਾਗਰਿਕਾਂ ਦੀ ਗਿਣਤੀ ਨਾ-ਮਾਤਰ ਹੈ। ਇਸ ਦਾ ਇੱਕ ਕਾਰਨ ਇਹ ਵੀ ਹੈ ਕਿ ਉਥੋਂ ਦੀ ਸਰਕਾਰ ਨੇ ਕਰੀਬ ਇੱਕ ਕਰੋੜ ਇਜ਼ਰਾਈਲੀਆਂ ਨੂੰ ਬੰਬ ਸ਼ੈਲਟਰ 'ਚ ਭੇਜ ਦਿੱਤਾ ਸੀ। ਦੂਜਾ ਅਤੇ ਸਭ ਤੋਂ ਵੱਡਾ ਕਾਰਨ ਇਹ ਹੈ ਕਿ ਇਸ ਹਮਲੇ ਵਿੱਚ ਇਰਾਨ ਨੇ ਇਜ਼ਰਾਈਲੀ ਨਾਗਰਿਕਾਂ ਦੀ ਬਜਾਏ ਫੌਜੀ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਇਆ ਹੈ। ਈਰਾਨ ਨੇ ਵੀ ਇਸ ਸਬੰਧੀ ਬਿਆਨ ਜਾਰੀ ਕੀਤਾ ਹੈ।
ਇਜ਼ਰਾਈਲ ਵਿੱਚ ਕਿੰਨਾ ਨੁਕਸਾਨ?
ਹਮਲਾ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਅਮਰੀਕੀ ਅਧਿਕਾਰੀਆਂ ਨੇ ਇਜ਼ਰਾਈਲ ਨੂੰ ਸੂਚਿਤ ਕਰ ਦਿੱਤਾ ਸੀ ਕਿ ਈਰਾਨ ਵੱਡੇ ਹਮਲੇ ਦੀ ਤਿਆਰੀ ਕਰ ਰਿਹਾ ਹੈ। ਜਿਸ ਤੋਂ ਬਾਅਦ ਇਜ਼ਰਾਈਲ ਦੀਆਂ ਸੜਕਾਂ 'ਤੇ ਹਫੜਾ-ਦਫੜੀ ਮਚ ਗਈ। ਸੋਸ਼ਲ ਮੀਡੀਆ 'ਤੇ ਆਈਆਂ ਤਸਵੀਰਾਂ 'ਚ ਦੇਖਿਆ ਜਾ ਰਿਹਾ ਹੈ ਕਿ ਲੋਕ ਡਰ ਦੇ ਮਾਹੌਲ 'ਚ ਬੰਬ ਸ਼ੈਲਟਰਾਂ ਵੱਲ ਭੱਜ ਰਹੇ ਹਨ।
ਈਰਾਨ ਦੇ ਪੱਖ 'ਤੇ, ਆਈਆਰਜੀਸੀ ਦੇ ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਇਜ਼ਰਾਈਲ ਦੇ ਤਿੰਨ ਏਅਰਬੇਸ ਨੇਵਾਤਿਮ, ਹਾਟਜ਼ਰੀਮ ਅਤੇ ਤੇਲ ਨੋਫ ਨੂੰ ਸਫਲਤਾਪੂਰਵਕ ਨਿਸ਼ਾਨਾ ਬਣਾਇਆ ਗਿਆ ਹੈ। ਇਨ੍ਹਾਂ ਹਵਾਈ ਟਿਕਾਣਿਆਂ 'ਤੇ ਖੜ੍ਹੇ ਕਰੀਬ 20 ਲੜਾਕੂ ਜਹਾਜ਼ਾਂ ਨੂੰ ਤਬਾਹ ਕਰਨ ਦੀ ਖ਼ਬਰ ਹੈ।
ਬਿਆਨ ਵਿੱਚ ਵਿਸਥਾਰ ਵਿੱਚ ਦੱਸਿਆ ਗਿਆ ਕਿ ਇਜ਼ਰਾਈਲ ਦੇ ਐੱਫ-35 ਲੜਾਕੂ ਜਹਾਜ਼ ਅਤੇ ਐੱਫ-15 ਲੜਾਕੂ ਜਹਾਜ਼ ਇਨ੍ਹਾਂ ਹਵਾਈ ਅੱਡੇ 'ਤੇ ਖੜ੍ਹੇ ਸਨ। ਜਿਨ੍ਹਾਂ ਦੀ ਵਰਤੋਂ ਹਿਜ਼ਬੁੱਲਾ ਦੇ ਮੁਖੀ ਸਈਅਦ ਹਸਨ ਨਸਰੱਲਾ ਦੀ ਹੱਤਿਆ 'ਚ ਕੀਤੀ ਗਈ ਸੀ।
ਈਰਾਨ ਦੇ ਫੌਜ ਮੁਖੀ ਜਨਰਲ ਮੁਹੰਮਦ ਬਘੇਰੀ
ਈਰਾਨ ਦੇ ਫੌਜ ਮੁਖੀ ਜਨਰਲ ਮੁਹੰਮਦ ਬਘੇਰੀ ਨੇ ਕਿਹਾ, "ਸਾਡੇ ਕੋਲ ਇਜ਼ਰਾਈਲ ਦੇ ਆਰਥਿਕ ਖੇਤਰਾਂ 'ਤੇ ਹਮਲਾ ਕਰਨ ਦੀ ਸਮਰੱਥਾ ਵੀ ਹੈ, ਪਰ ਅਸੀਂ ਸਿਰਫ ਫੌਜੀ ਟਿਕਾਣਿਆਂ ਨੂੰ ਨਿਸ਼ਾਨਾ ਬਣਾਇਆ ਹੈ। "ਇਹ ਸੰਜਮ ਲਈ ਅਮਰੀਕੀ ਬੇਨਤੀ ਅਤੇ ਗਾਜ਼ਾ ਵਿੱਚ ਜੰਗਬੰਦੀ ਦੇ ਵਾਅਦਿਆਂ ਕਾਰਨ ਕੀਤਾ ਗਿਆ ਹੈ।"
ਈਰਾਨ ਨੇ ਹਮਲਾ ਕਿਉਂ ਕੀਤਾ?
IRGC ਨੇ ਇਹ ਹਮਲਾ ਇਜ਼ਰਾਈਲ ਦੁਆਰਾ ਪ੍ਰੌਕਸੀ ਅਤੇ IRGC ਨੇਤਾਵਾਂ ਦੀ ਹਾਲ ਹੀ ਵਿੱਚ ਕੀਤੀ ਗਈ ਹੱਤਿਆ ਦੇ ਜਵਾਬ ਵਿੱਚ ਕੀਤਾ ਹੈ। ਆਈਆਰਜੀਸੀ ਨੇ ਇੱਕ ਬਿਆਨ ਵਿੱਚ ਕਿਹਾ, “ਅਸੀਂ ਸ਼ਹੀਦ ਹਾਨੀਆ, ਸਈਦ ਹਸਨ ਨਸਰੱਲਾਹ ਅਤੇ ਨੀਲਫੋਰੂਸ਼ੀਅਨ ਦੀ ਹੱਤਿਆ ਦੇ ਜਵਾਬ ਵਿੱਚ ਕਬਜ਼ੇ ਵਾਲੇ ਖੇਤਰਾਂ ਦੇ ਕੇਂਦਰ ਨੂੰ ਨਿਸ਼ਾਨਾ ਬਣਾਇਆ।
ਉਸਨੇ ਇਹ ਵੀ ਕਿਹਾ, "ਇਹ ਆਪਰੇਸ਼ਨ ਸਵੈ-ਰੱਖਿਆ ਦੇ ਅਧਿਕਾਰ ਅਤੇ ਅੰਤਰਰਾਸ਼ਟਰੀ ਕਾਨੂੰਨਾਂ ਦੇ ਅਨੁਸਾਰ ਕੀਤਾ ਗਿਆ ਹੈ।" ਨਾਲ ਹੀ, IRGC ਨੇ ਇਜ਼ਰਾਈਲ ਨੂੰ ਚੇਤਾਵਨੀ ਦਿੱਤੀ ਹੈ ਕਿ ਜੇ ਉਹ ਜਵਾਬ ਦਿੰਦਾ ਹੈ ਤਾਂ ਹੋਰ ਵੀ ਮਾੜੇ ਨਤੀਜੇ ਭੁਗਤਣੇ ਪੈਣਗੇ।
ਇਸ ਹਮਲੇ ਤੋਂ ਬਾਅਦ ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਨੇਤਨਯਾਹੂ ਨੇ ਕਿਹਾ, "ਈਰਾਨੀ ਸ਼ਾਸਨ ਸਾਡੇ ਦੁਸ਼ਮਣਾਂ ਦੇ ਖਿਲਾਫ ਜਵਾਬੀ ਕਾਰਵਾਈ ਕਰਨ ਦੇ ਸੰਕਲਪ ਨੂੰ ਨਹੀਂ ਜਾਣਦਾ ਹੈ।"
ਨੇਤਨਯਾਹੂ ਨੇ ਈਰਾਨ ਨੂੰ ਚੇਤਾਵਨੀ ਦਿੰਦੇ ਹੋਏ ਕਿਹਾ, ਹਮਾਸ ਦੇ ਨੇਤਾ ਯਾਹਿਆ, ਸਿਨਵਰ ਅਤੇ ਡੇਫ ਨੇ ਇਸ ਗੱਲ ਨੂੰ ਨਹੀਂ ਸਮਝਿਆ, ਹਿਜ਼ਬੁੱਲਾ ਨੇਤਾ ਹਸਨ ਨਸਰੱਲਾ ਅਤੇ ਹਿਜ਼ਬੁੱਲਾ ਦੇ ਚੀਫ ਆਫ ਸਟਾਫ ਫੁਆਦ ਸ਼ੁਕਰ ਨੂੰ ਵੀ ਇਸ ਗੱਲ ਦੀ ਸਮਝ ਨਹੀਂ ਹੈ ਅਤੇ ਸ਼ਾਇਦ ਤਹਿਰਾਨ ਵਿੱਚ ਵੀ ਅਜਿਹੇ ਲੋਕ ਹਨ ਜੋ ਇਹ ਨਹੀਂ ਸਮਝਦੇ।
ਉਸਨੇ ਅੱਗੇ ਕਿਹਾ, "ਇਰਾਨ ਸਮਝ ਜਾਵੇਗਾ ਕਿ ਜੋ ਕੋਈ ਸਾਡੇ 'ਤੇ ਹਮਲਾ ਕਰੇਗਾ, ਅਸੀਂ ਉਸ 'ਤੇ ਹਮਲਾ ਕਰਾਂਗੇ।
- PTC NEWS
