ਸਕੂਲਾਂ ਤੇ ਪੰਜਾਬ ਸਿਵਲ ਸਕੱਤਰੇਤ ਨੂੰ ਬੰਬ ਨਾਲ ਉਡਾਉਣ ਦੀਆਂ ਧਮਕੀਆਂ ਦੇਣ ਵਾਲਾ ਕਾਬੂ
Punjab News: ਚੰਡੀਗੜ੍ਹ ਪੁਲਿਸ ਨੇ ਸਕੂਲਾਂ ਅਤੇ ਪੰਜਾਬ ਸਿਵਲ ਸਕੱਤਰੇਤ ਨੂੰ ਈ-ਮੇਲ ਰਾਹੀਂ ਬੰਬ ਧਮਾਕਿਆਂ ਦੀਆਂ ਝੂਠੀਆਂ ਧਮਕੀਆਂ ਦੇਣ ਵਾਲੇ ਮੁਲਜ਼ਮ ਸੌਰਵ ਬਿਸਵਾਸ (30) ਨੂੰ ਗ੍ਰਿਫ਼ਤਾਰ ਕੀਤਾ। ਮੁਲਜ਼ਮ ਪੱਛਮੀ ਬੰਗਾਲ ਦਾ ਰਹਿਣ ਵਾਲਾ ਹੈ ਅਤੇ ਪਹਿਲਾਂ ਬੰਗਲਾਦੇਸ਼ ਤੋਂ ਭਾਰਤ ਆਇਆ ਸੀ। ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਉਹ ਟੈਕ-ਸੈਵੀ ਫ੍ਰੀਲਾਂਸਰ ਹੈ ਅਤੇ ਆਨਲਾਈਨ Gmail ਅਕਾਊਂਟਾਂ ਦੀ ਖਰੀਦ-ਫਰੋਖ਼ਤ ਕਰਦਾ ਸੀ।
ਉਸ ਨੇ ਕਰੀਬ 300 Gmail ਅਕਾਊਂਟ ਖਰੀਦੇ, ਜਿਨ੍ਹਾਂ ਵਿੱਚੋਂ 219 ਇੱਕ ਬੰਗਲਾਦੇਸ਼ੀ ਵਿਅਕਤੀ ਨੂੰ ਵੇਚੇ ਗਏ। ਦਿੱਲੀ ਅਤੇ ਅਹਿਮਦਾਬਾਦ ਵਿੱਚ ਵੀ ਇਸ ਤਰ੍ਹਾਂ ਦੀਆਂ ਧਮਕੀ ਭਰੀਆਂ ਈ-ਮੇਲਾਂ ਨਾਲ ਜੁੜੇ ਮਾਮਲੇ ਦਰਜ ਹਨ। ਚੰਡੀਗੜ੍ਹ ਪੁਲਿਸ ਵੱਲੋਂ ਹੋਰ ਪੁੱਛਗਿੱਛ ਜਾਰੀ ਹੈ।
28 ਜਨਵਰੀ 2026 ਨੂੰ ਟੈਂਡਰ ਹਾਰਟ ਸਕੂਲ, GMSSS ਸੈਕਟਰ-16, ਸੈਕਟਰ-19 ਅਤੇ ਸੈਕਟਰ-35 ਨੂੰ ਈ-ਮੇਲ ਰਾਹੀਂ ਬੰਬ ਧਮਕੀ ਮਿਲੀ ਸੀ, ਜਿਸ ਕਾਰਨ ਇਲਾਕੇ ਵਿੱਚ ਹੜਕੰਪ ਮਚ ਗਿਆ ਸੀ।
ਇਸ ਤੋਂ ਅਗਲੇ ਦਿਨ 29 ਜਨਵਰੀ ਨੂੰ ਪੰਜਾਬ ਸਿਵਲ ਸਕੱਤਰੇਤ ਨੂੰ ਵੀ ਧਮਕੀ ਭਰੀ ਈ-ਮੇਲ ਭੇਜੀ ਗਈ ਸੀ। ਚੰਡੀਗੜ੍ਹ ਪੁਲਿਸ ਦੇ ਸੈਕਟਰ-17 ਅਤੇ ਸੈਕਟਰ-3 ਥਾਣਿਆਂ ਨੇ ਤਕਨੀਕੀ ਜਾਂਚ ਅਤੇ ਈ-ਮੇਲ ਟ੍ਰੈਕਿੰਗ ਰਾਹੀਂ ਮੁਲਜ਼ਮ ਸੌਰਵ ਬਿਸਵਾਸ (30) ਤੱਕ ਪਹੁੰਚ ਕੀਤੀ।
ਮੁਲਜ਼ਮ ਪਹਿਲਾਂ ਅਹਿਮਦਾਬਾਦ ਸਾਈਬਰ ਕਰਾਈਮ ਪੁਲਿਸ ਵੱਲੋਂ ਵੀ ਇਸੇ ਤਰ੍ਹਾਂ ਦੇ ਹੋਕਸ ਬੰਬ ਧਮਕੀ ਮਾਮਲੇ ਵਿੱਚ ਗ੍ਰਿਫ਼ਤਾਰ ਕੀਤਾ ਜਾ ਚੁੱਕਾ ਸੀ। ਚੰਡੀਗੜ੍ਹ ਪੁਲਿਸ ਨੇ ਪ੍ਰੋਡਕਸ਼ਨ ਵਾਰੰਟ ਲੈ ਕੇ 2 ਜੂਨ 2026 ਨੂੰ ਉਸਨੂੰ ਆਪਣੀ ਹਿਰਾਸਤ ਵਿੱਚ ਲਿਆ।
- PTC NEWS
