Mansa News : ਮਾਨਸਾ ਦੇ ਨੌਜਵਾਨ ਦੀ ਕੈਨੇਡਾ ‘ਚ ਹੋਈ ਮੌਤ ,ਵਾਲੀਬਾਲ ਖੇਡਦੇ ਸਮੇਂ ਵਾਪਰਿਆ ਦਰਦਨਾਕ ਹਾਦਸਾ
Mansa News : ਮਾਨਸਾ ਦੇ ਨੌਜਵਾਨ ਜਤਿਨ ਗਰਗ (26) ਦੀ ਕੈਨੇਡਾ 'ਚ ਡੂੰਘੇ ਦਰਿਆ ਵਿੱਚ ਡੁੱਬਣ ਕਾਰਨ ਮੌਤ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਜਤਿਨ ਗਰਗ ਦੀ ਵਾਲੀਬਾਲ ਖੇਡਦੇ ਸਮੇਂ ਉਥੇ ਡੂੰਘੇ ਦਰਿਆ 'ਚ ਡੁੱਬ ਕੇ ਮੌਤ ਹੋ ਗਈ ਹੈ। ਜਤਿਨ ਦੀ ਲਾਸ਼ ਦਰਿਆ ‘ਚੋਂ ਮਿਲ ਗਈ ਹੈ, ਜਿਸ ਨੂੰ ਇਥੇ ਲਿਆਉਣ ਦੇ ਯਤਨ ਕੀਤੇ ਜਾ ਰਹੇ ਹਨ। ਇਸ ਘਟਨਾ ਤੋਂ ਬਾਅਦ ਪਰਿਵਾਰ ਡੂੰਘੇ ਸਦਮੇ ਵਿੱਚ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਜਤਿਨ ਗਰਗ ਆਪਣੇ ਸਾਥੀਆਂ ਨਾਲ ਉਥੋਂ ਦੇ ੳਵਰਲੈਂਡਰ ਪਾਰਕ ‘ਚ ਵਾਲੀਵਾਲ ਖੇਡ ਰਿਹਾ ਸੀ ਤੇ ਅਚਾਨਕ ਬਾਲ ਦਰਿਆ ਕੰਢੇ ਪਾਣੀ ‘ਚ ਡਿੱਗ ਪਈ। ਜਤਿਨ ਨੇ ਬਾਲ ਚੁੱਕਣ ਦੀ ਕੋਸ਼ਿਸ਼ ਕੀਤੀ ਤੇ ਉਹ ਦਰਿਆ ‘ਚ ਰੁੜ ਗਿਆ। ਉਸਦਾ ਕਈ ਦਿਨਾਂ ਤੱਕ ਕੁਝ ਪਤਾ ਨਾ ਲੱਗਿਆ। ਕਰੀਬ ਇਕ ਹਫਤੇ ਬਾਅਦ ਜਤਿਨ ਗਰਗ ਦੀ ਮ੍ਰਿਤਕ ਦੇਹ ਕਰੀਬ 4 ਕਿਲੋਮੀਟਰ ਦੂਰ ਮੈਕਅਰਬਰ ਆਈਲੈਂਡ ਪਾਰਕ ਨੇੜਿਓਂ ਦਰਿਆ ‘ਚੋਂ ਮਿਲੀ।
ਇਹ ਮੰਗਭਾਗੀ ਖਬਰ ਜਦੋਂ ਜਤਿਨ ਦੇ ਮਾਪਿਆਂ ਕੋਲ ਪਹੁੰਚੀ ਤਾਂ ਉਹਨਾਂ ਪੈਰਾਂ ਹੇਠੋਂ ਜ਼ਮੀਨ ਨਿਕਲ ਗਈ। ਇਸ ਘਟਨਾ ਨੂੰ ਲੈ ਕੇ ਸ਼ਹਿਰ ਮਾਨਸਾ ‘ਚ ਸੋਗ ਦਾ ਮਾਹੌਲ ਹੈ ਤੇ ਮੱਤੀ ਪਰਿਵਾਰ ‘ਚ ਮਾਤਮ ਛਾਇਆ ਹੋਇਆ ਹੈ। ਜਤਿਨ ਗਰਗ ਕੈਨੇਡਾ ਜਾਣ ਤੋਂ ਪਹਿਲਾਂ ਗੁੜਗਾਓਂ ਵਿਖੇ ਇੰਜੀਨੀਅਰ ਵਜੋਂ ਨੌਕਰੀ ਕਰਦਾ ਸੀ ਪਰ ਬਾਅਦ ‘ਚ ਉਹ ਪੜ੍ਹਾਈ ਕਰਨ ਲਈ ਕੈਨੇਡਾ ਚਲਾ ਗਿਆ ਸੀ।
ਮ੍ਰਿਤਕ ਜਤਿਨ ਗਰਗ ਦੇ ਚਾਚਾ ਭੂਸ਼ਨ ਮੱਤੀ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਜਤਿਨ ਗਰਗ ਇੰਜੀਨੀਅਰ ਸੀ ਤੇ ਉਹ 11 ਮਹੀਨੇ ਪਹਿਲਾਂ ਹੀ ਕੈਨੇਡਾ ਸਟੂਡੈਂਟ ਵੀਜ਼ੇ ‘ਤੇ ਗਿਆ ਸੀ। ਜਤਿਨ ਗਰਗ ਕੈਪਲੂਪਸ ਦੀ ਥਮਪਸਨ ਰਿਵਰਜ ਯੂਨੀਵਰਸਿਟੀ ਵਿਖੇ ਚੇਨ ਮੈਨੇਜਮੈਂਟ ਮਾਸਟਰ ਡਿਗਰੀ ਦੀ ਪੜ੍ਹਾਈ ਕਰ ਰਿਹਾ ਸੀ। ਜਤਿਨ ਗਰਗ ਮਾਨਸਾ ਦੇ ਧਰਮਪਾਲ ਮੱਤੀ ਦਾ ਪੁੱਤਰ ਸੀ,ਜੋ 2004 ਤੋਂ ਚੰਡੀਗੜ੍ਹ ਵਿਖੇ ਰਹਿ ਰਹੇ ਹਨ। ਜਤਿਨ ਗਰਗ ਦਾ ਅੰਤਿਮ ਸਸਕਾਰ ਮਾਨਸਾ ਕੀਤਾ ਜਾਵੇਗਾ।
- PTC NEWS
