ਮੈਕਸਵੈੱਲ ਨਹੀਂ ਬਲਕਿ ਇਸ ਬੱਲੇਬਾਜ਼ ਦੇ ਨਾਂ ਇਕ ਪਾਰੀ ਵਿਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਦਾ ਹੈ ਰਿਕਾਰਡ
Glenn Maxwell: ਆਸਟ੍ਰੇਲੀਆ ਖਿਡਾਰੀ ਗਲੇਨ ਮੈਕਸਵੈੱਲ ਨੇ ਮੁੰਬਈ ਦੇ ਵਾਨਖੇੜੇ ਸਟੇਡੀਅਮ 'ਚ ਤੂਫਾਨੀ ਦੋਹਰਾ ਸੈਂਕੜਾ ਲਗਾਇਆ। ਹਾਲਾਂਕਿ ਉਹ ਅਜੇ ਵੀ ਵਨਡੇ ਵਿਸ਼ਵ ਕੱਪ ਦੀ ਇਕ ਪਾਰੀ 'ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਦਾ ਰਿਕਾਰਡ ਨਹੀਂ ਤੋੜ ਸਕਿਆ। ਇਹ ਰਿਕਾਰਡ ਨਿਊਜ਼ੀਲੈਂਡ ਦੇ ਕ੍ਰਿਕਟਰ ਮਾਰਟਿਨ ਗੁਪਟਿਲ ਦੇ ਨਾਂ ਹੈ। ਮੰਗਲਵਾਰ ਨੂੰ ਖੇਡੇ ਗਏ ਮੈਚ 'ਚ ਆਸਟ੍ਰੇਲੀਆ ਨੇ ਅਫਗਾਨਿਸਤਾਨ ਨੂੰ 3 ਵਿਕਟਾਂ ਨਾਲ ਹਰਾਇਆ।
ਦਰਅਸਲ, ਵਨਡੇ ਵਿਸ਼ਵ ਕੱਪ ਦੀ ਇੱਕ ਪਾਰੀ ਵਿੱਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਦਾ ਰਿਕਾਰਡ ਮਾਰਟਿਨ ਗੁਪਟਿਲ ਦੇ ਨਾਮ ਹੈ। ਉਸ ਨੇ 237 ਅਜੇਤੂ ਦੌੜਾਂ ਬਣਾਈਆਂ ਸਨ। ਗੁਪਟਿਲ ਨੇ ਵਿਸ਼ਵ ਕੱਪ 2015 ਵਿੱਚ ਵੈਸਟਇੰਡੀਜ਼ ਖ਼ਿਲਾਫ਼ 163 ਗੇਂਦਾਂ ਦਾ ਸਾਹਮਣਾ ਕਰਦਿਆਂ 24 ਚੌਕੇ ਤੇ 11 ਛੱਕੇ ਲਾਏ ਸਨ। ਦੂਜੇ ਨੰਬਰ 'ਤੇ ਕ੍ਰਿਸ ਗੇਲ ਹਨ। ਗੇਲ ਨੇ 2015 'ਚ ਜ਼ਿੰਬਾਬਵੇ ਖਿਲਾਫ 215 ਦੌੜਾਂ ਬਣਾਈਆਂ ਸਨ। 147 ਗੇਂਦਾਂ ਦਾ ਸਾਹਮਣਾ ਕਰਦੇ ਹੋਏ ਉਸ ਨੇ 10 ਚੌਕੇ ਅਤੇ 16 ਛੱਕੇ ਜੜੇ। ਮੈਕਸਵੈੱਲ ਤੀਜੇ ਨੰਬਰ 'ਤੇ ਹੈ। ਉਸ ਨੇ ਅਫਗਾਨਿਸਤਾਨ ਖਿਲਾਫ ਅਜੇਤੂ 201 ਦੌੜਾਂ ਬਣਾਈਆਂ ਸਨ।
ਜੇਕਰ ਵਨਡੇ ਵਿਸ਼ਵ ਕੱਪ ਦੀ ਇਕ ਪਾਰੀ 'ਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਭਾਰਤੀ ਖਿਡਾਰੀਆਂ ਦੀ ਸੂਚੀ 'ਤੇ ਨਜ਼ਰ ਮਾਰੀਏ ਤਾਂ ਸੌਰਵ ਗਾਂਗੁਲੀ ਪਹਿਲੇ ਨੰਬਰ 'ਤੇ ਹਨ। ਗਾਂਗੁਲੀ ਨੇ 1999 'ਚ ਸ਼੍ਰੀਲੰਕਾ ਖਿਲਾਫ 158 ਗੇਂਦਾਂ ਦਾ ਸਾਹਮਣਾ ਕਰਦੇ ਹੋਏ 183 ਦੌੜਾਂ ਬਣਾਈਆਂ ਸਨ। ਗਾਂਗੁਲੀ ਸਮੁੱਚੀ ਸੂਚੀ ਵਿੱਚ ਪੰਜਵੇਂ ਸਥਾਨ 'ਤੇ ਹਨ। ਉਸ ਨੇ ਆਪਣੀ ਪਾਰੀ ਦੌਰਾਨ 17 ਚੌਕੇ ਅਤੇ 7 ਛੱਕੇ ਲਗਾਏ।
ਤੁਹਾਨੂੰ ਦੱਸ ਦੇਈਏ ਕਿ ਵਿਸ਼ਵ ਕੱਪ 2023 ਵਿੱਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਦਾ ਰਿਕਾਰਡ ਕਵਿੰਟਨ ਡੀ ਕਾਕ ਦੇ ਨਾਮ ਹੈ। ਉਸ ਨੇ 8 ਮੈਚਾਂ 'ਚ 550 ਦੌੜਾਂ ਬਣਾਈਆਂ ਹਨ। ਵਿਰਾਟ ਕੋਹਲੀ ਦੂਜੇ ਨੰਬਰ 'ਤੇ ਹਨ। ਕੋਹਲੀ ਨੇ 8 ਮੈਚਾਂ 'ਚ 543 ਦੌੜਾਂ ਬਣਾਈਆਂ ਹਨ। ਰਚਿਨ ਰਵਿੰਦਰ ਤੀਜੇ ਨੰਬਰ 'ਤੇ ਹਨ। ਉਸ ਨੇ 8 ਮੈਚਾਂ 'ਚ 523 ਦੌੜਾਂ ਬਣਾਈਆਂ ਹਨ। ਸਭ ਤੋਂ ਜ਼ਿਆਦਾ ਵਿਕਟਾਂ ਲੈਣ ਵਾਲੇ ਗੇਂਦਬਾਜ਼ਾਂ ਦੀ ਸੂਚੀ 'ਤੇ ਨਜ਼ਰ ਮਾਰੀਏ ਤਾਂ ਸ਼੍ਰੀਲੰਕਾ ਦੇ ਮਦੁਸ਼ੰਕਾ ਪਹਿਲੇ ਨੰਬਰ 'ਤੇ ਹਨ। ਉਸ ਨੇ 8 ਮੈਚਾਂ 'ਚ 21 ਵਿਕਟਾਂ ਲਈਆਂ ਹਨ। ਐਡਮ ਜ਼ੈਂਪਾ ਦੂਜੇ ਨੰਬਰ 'ਤੇ ਹੈ। ਉਸ ਨੇ 20 ਵਿਕਟਾਂ ਲਈਆਂ ਹਨ।
- PTC NEWS
