ਮੰਡੀ: ਚਲਦੀ ਬੱਸ ਦੀ ਫਟੀ ਪ੍ਰੈਸ਼ਰ ਪਾਈਪ, ਸਵਾਰੀਆਂ ਨਾਲ ਭਰੀ ਬੱਸ ਦੇ ਡਰਾਈਵਰ ਨੇ ਸਮਝਦਾਰੀ ਦਿਖਾ ਬਚਾਈ ਜਾਨਾਂ
ਮੰਡੀ (ਹਿਮਾਚਲ ਪ੍ਰਦੇਸ਼), 21 ਫਰਵਰੀ: ਹਿਮਾਚਲ ਪ੍ਰਦੇਸ਼ ਦੇ ਮੰਡੀ ਜ਼ਿਲੇ ਦੇ ਕਾਰਸੋਗ ਕਸਬੇ 'ਚ ਮੰਗਲਵਾਰ ਨੂੰ ਵਿਦਿਆਰਥੀਆਂ ਨੂੰ ਲੈ ਕੇ ਜਾ ਰਹੀ ਇਕ ਨਿੱਜੀ ਬੱਸ ਸੜਕ ਕਿਨਾਰੇ ਟਕਰਾ ਗਈ। ਇਹ ਹਾਦਸਾ ਬੱਸ ਦੀ ਪ੍ਰੈਸ਼ਰ ਪਾਈਪ ਫਟਣ ਕਾਰਨ ਵਾਪਰਿਆ ਪਰ ਡਰਾਈਵਰ ਨੇ ਸਮਝਦਾਰੀ ਦਿਖਾਉਂਦੇ ਹੋਏ ਬੱਸ ਨੂੰ ਡੰਗੇ ਨਾਲ ਟਕਰਾ ਕੇ 49 ਵਿਦਿਆਰਥੀਆਂ ਦੀ ਜਾਨ ਬਚਾਈ। ਹਾਲਾਂਕਿ ਇਸ ਹਾਦਸੇ 'ਚ 4 ਵਿਦਿਆਰਥਣਾਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ, ਜਿਨ੍ਹਾਂ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਕਰਸੋਗ ਪਹੁੰਚਾਇਆ ਗਿਆ।
ਨਿੱਜੀ ਬੱਸ ਨੰਬਰ ਐਚਪੀ 21-ਏ 5806 ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਬਾਗਸਾਦ ਤੋਂ ਖੇਤੀਬਾੜੀ ਵਿਸਥਾਰ ਦਫ਼ਤਰ ਕਾਰਸੋਗ ਜਾ ਰਹੀ ਸੀ। ਬੱਸ ਵਿੱਚ ਖੇਤੀਬਾੜੀ ਸਟਰੀਮ ਦੇ 49 ਵੋਕੇਸ਼ਨਲ ਵਿਦਿਆਰਥੀਆਂ ਨੂੰ ਇੱਕ ਰੋਜ਼ਾ ਸਿਖਲਾਈ ਲਈ ਲਿਜਾਇਆ ਜਾ ਰਿਹਾ ਸੀ ਪਰ ਸਨਾਰਲੀ ਨੇੜੇ ਅਚਾਨਕ ਬੱਸ ਦਾ ਪ੍ਰੈਸ਼ਰ ਪਾਈਪ ਫਟ ਗਿਆ। ਡਰਾਈਵਰ ਨੇ ਵਿਦਿਆਰਥੀਆਂ ਦੀ ਜਾਨ ਬਚਾਉਣ ਲਈ ਬੱਸ ਨੂੰ ਡੰਗੇ ਵਿੱਚ ਦੇ ਮਾਰਿਆ। ਅਜਿਹੇ 'ਚ ਡਰਾਈਵਰ ਦੀ ਸਮਝਦਾਰੀ ਕਾਰਨ ਵੱਡਾ ਹਾਦਸਾ ਹੋਣੋਂ ਟਲ ਗਿਆ।
ਐਸਡੀਐਮ ਓਮਕਾਂਤ ਠਾਕੁਰ ਨੇ ਸਾਰੀਆਂ ਸੰਸਥਾਵਾਂ ਨੂੰ ਤਕਨੀਕੀ ਜਾਂਚ ਕਰਵਾ ਕੇ ਹੀ ਬੱਸਾਂ ਨੂੰ ਦੌਰੇ ’ਤੇ ਭੇਜਣ ਦਾ ਸੁਨੇਹਾ ਦਿੱਤਾ। ਅਜਿਹੀਆਂ ਸਾਵਧਾਨੀਆਂ ਵਰਤ ਕੇ ਹਾਦਸਿਆਂ ਦੀਆਂ ਸੰਭਾਵਨਾਵਾਂ ਨੂੰ ਘਟਾਇਆ ਜਾ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਫੀਲਡ ਅਧਿਕਾਰੀਆਂ ਨੂੰ ਨਿਯਮਾਂ ਅਨੁਸਾਰ ਜ਼ਖਮੀਆਂ ਨੂੰ ਵਿੱਤੀ ਸਹਾਇਤਾ ਦੇਣ ਲਈ ਜ਼ਰੂਰੀ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਗਏ ਹਨ। ਡੀਐਸਪੀ ਗੀਤਾਂਜਲੀ ਠਾਕੁਰ ਦਾ ਕਹਿਣਾ ਹੈ ਕਿ ਸਨਾਰਲੀ ਨੇੜੇ ਇੱਕ ਨਿੱਜੀ ਬੱਸ ਹਾਦਸੇ ਦਾ ਸ਼ਿਕਾਰ ਹੋ ਗਈ, ਜਿਸ ਵਿੱਚ 4 ਵਿਦਿਆਰਥਣਾਂ ਜ਼ਖ਼ਮੀ ਹੋ ਗਈਆਂ। ਉਨ੍ਹਾਂ ਦੱਸਿਆ ਕਿ ਮਾਮਲਾ ਦਰਜ ਕਰਕੇ ਅਗਲੇਰੀ ਕਾਰਵਾਈ ਕੀਤੀ ਜਾ ਰਹੀ ਹੈ।
- PTC NEWS
