Khanna : ਸ਼ਾਹੀ ਜ਼ਿੰਦਗੀ ਦਾ ਚਸਕਾ ! BBA ਛੱਡ ਕੇ ਬਣਾਇਆ ਫਰਜ਼ੀ ਮੈਡੀਕਲ ਗਿਰੋਹ, ਮਾਸਟਰਮਾਈਂਡ ਸਮੇਤ ਦੋ ਗ੍ਰਿਫ਼ਤਾਰ
Khanna : ਪੰਜਾਬ ਦੇ ਖੰਨਾ ਵਿੱਚ ਪੁਲਿਸ (Khanna Police) ਨੇ ਵੱਡੇ ਜਾਅਲੀ ਮੈਡੀਕਲ ਅਤੇ ਡੋਪ ਟੈਸਟ ਰੈਕੇਟ (Fake Medical Certificate Scam) ਦਾ ਭੰਡਾਫੋੜ ਕਰਦੇ ਹੋਏ ਦੋ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਹੈਰਾਨੀਜਨਕ ਗੱਲ ਇਹ ਹੈ ਕਿ ਇਸ ਗਿਰੋਹ ਦਾ ਮਾਸਟਰਮਾਈਂਡ ਸਿਰਫ 23 ਸਾਲ ਦਾ BBA ਡਰਾਪਆਉਟ ਮੰਚਿਤ ਕੁਮਾਰ ਨਿਕਲਿਆ, ਜੋ ਆਪਣੇ ਸਾਥੀ ਰਮੇਸ਼ ਕੁਮਾਰ ਉਰਫ ਟੋਨੀ ਨਾਲ ਮਿਲ ਕੇ ਲੰਮੇ ਸਮੇਂ ਤੋਂ ਇਹ ਗੈਰਕਾਨੂੰਨੀ ਧੰਦਾ ਚਲਾ ਰਿਹਾ ਸੀ।
ਵੱਖ-ਵੱਖ ਸਰਕਾਰੀ ਕੰਮਾਂ ਲਈ ਤਿਆਰ ਕਰਦੇ ਸਨ ਜਾਅਲੀ ਮੈਡੀਕਲ ਸਰੀਫਿਕੇਟ
ਪੁਲਿਸ ਜਾਂਚ ਦੌਰਾਨ ਸਾਹਮਣੇ ਆਇਆ ਹੈ ਕਿ ਮੁਲਜ਼ਮ ਅਸਲਾ ਲਾਇਸੈਂਸ ਬਣਵਾਉਣ ਲਈ ਜਾਅਲੀ ਡੋਪ ਟੈਸਟ, ਨਕਲੀ ਮੈਡੀਕਲ ਸਰਟੀਫਿਕੇਟ ਅਤੇ ਸਰਕਾਰੀ ਨੌਕਰੀਆਂ ਲਈ ਫਰਜ਼ੀ ਮੈਡੀਕਲ ਰਿਪੋਰਟਾਂ ਤਿਆਰ ਕਰਦੇ ਸਨ। ਇਸ ਤੋਂ ਇਲਾਵਾ ਅਦਾਲਤਾਂ ਵਿੱਚ ਪੇਸ਼ ਕਰਨ ਲਈ ਵੀ ਜਾਅਲੀ ਮੈਡੀਕਲ ਦਸਤਾਵੇਜ਼ ਬਣਾਏ ਜਾਂਦੇ ਸਨ।
ਜਾਣਕਾਰੀ ਮੁਤਾਬਕ ਕੋਵਿਡ ਦੌਰਾਨ ਮੰਚਿਤ ਕੁਮਾਰ ਨੇ ਖੰਨਾ ਦੇ ਸਿਵਲ ਹਸਪਤਾਲ ਵਿੱਚ ਪ੍ਰਾਈਵੇਟ ਤੌਰ ‘ਤੇ ਕੰਮ ਕਰਨਾ ਸ਼ੁਰੂ ਕੀਤਾ ਸੀ। ਇਸ ਦੌਰਾਨ ਉਸਨੇ ਹਸਪਤਾਲ ਦੀ ਕਾਰਗੁਜ਼ਾਰੀ ਅਤੇ ਦਸਤਾਵੇਜ਼ੀ ਸਿਸਟਮ ਬਾਰੇ ਪੂਰੀ ਜਾਣਕਾਰੀ ਹਾਸਲ ਕਰ ਲਈ, ਜਿਸਦਾ ਬਾਅਦ ਵਿੱਚ ਗਲਤ ਫਾਇਦਾ ਚੁੱਕਿਆ ਗਿਆ।
ਇੱਕ ਡੋਪ ਟੈਸਟ ਦੇ ਲੈਂਦੇ ਸਨ 10 ਤੋਂ 30 ਹਜ਼ਾਰ ਰੁਪਏ
ਪੁਲਿਸ ਨੇ ਖੁਲਾਸਾ ਕੀਤਾ ਹੈ ਕਿ ਮੁਲਜ਼ਮਾਂ ਕੋਲੋਂ ਰਿਟਾਇਰਡ ਅਤੇ ਮੌਜੂਦਾ SMO ਸਮੇਤ ਕਈ ਡਾਕਟਰਾਂ ਦੀਆਂ ਜਾਅਲੀ ਮੋਹਰਾਂ, ਡੋਪ ਟੈਸਟ ਦੀਆਂ ਸੀਲਾਂ, ਓਪੀਡੀ ਸਲਿੱਪਾਂ, ਆਧਾਰ ਕਾਰਡ, ਪੈਨ ਕਾਰਡ ਅਤੇ ਹੋਰ ਦਸਤਾਵੇਜ਼ ਬਰਾਮਦ ਹੋਏ ਹਨ। ਇਨ੍ਹਾਂ ਦੀ ਮਦਦ ਨਾਲ ਇਹ ਲੋਕ ਅਸਲੀ ਵਰਗੇ ਲੱਗਣ ਵਾਲੇ ਕਾਗਜ਼ ਤਿਆਰ ਕਰਕੇ ਲੋਕਾਂ ਨੂੰ ਠੱਗਦੇ ਸਨ। ਇੱਕ ਡੋਪ ਟੈਸਟ ਦੇ 10 ਤੋਂ 30 ਹਜ਼ਾਰ ਰੁਪਏ ਲਏ ਜਾਂਦੇ ਸੀ।
ਗ੍ਰਿਫਤਾਰ ਕੀਤੇ ਗਏ ਮੁਲਜ਼ਮਾਂ ਵਿੱਚ ਰਮੇਸ਼ ਕੁਮਾਰ ਉਰਫ ਟੋਨੀ ਵਾਸੀ ਫੀਲਡਗੰਜ, ਲੁਧਿਆਣਾ ਅਤੇ ਮੰਚਿਤ ਕੁਮਾਰ ਵਾਸੀ ਖੰਨਾ ਸ਼ਾਮਲ ਹਨ। ਦੋਵੇਂ ਆਪਣੇ ਸ਼ਹਿਰਾਂ ਵਿੱਚ ਸਰਕਾਰੀ ਹਸਪਤਾਲ ਅੰਦਰ ਸਾਈਕਲ ਸਟੈਂਡ/ਪਾਰਕਿੰਗ ਚਲਾਉਣ ਦੀ ਆੜ ਵਿੱਚ ਇਸ ਰੈਕੇਟ ਨੂੰ ਚਲਾ ਰਹੇ ਸਨ।
ਇਹ ਕਾਰਵਾਈ ਡੀ.ਆਈ.ਜੀ ਲੁਧਿਆਣਾ ਰੇਂਜ ਸਤਿੰਦਰ ਸਿੰਘ ਦੇ ਦਿਸ਼ਾ-ਨਿਰਦੇਸ਼ਾਂ ਅਤੇ ਐਸ.ਐਸ.ਪੀ ਖੰਨਾ ਡਾ. ਦਰਪਣ ਆਹਲੂਵਾਲੀਆ ਦੀ ਅਗਵਾਈ ਹੇਠ ਚਲਾਈ ਜਾ ਰਹੀ ਵਿਸ਼ੇਸ਼ ਮੁਹਿੰਮ ਤਹਿਤ ਕੀਤੀ ਗਈ। ਪੁਲਿਸ ਟੀਮ ਨੇ ਯੋਜਨਾਬੱਧ ਢੰਗ ਨਾਲ ਕਾਰਵਾਈ ਕਰਦੇ ਹੋਏ ਦੋਵੇ ਮੁਲਜ਼ਮਾਂ ਨੂੰ ਕਾਬੂ ਕੀਤਾ।
ਫਿਲਹਾਲ ਦੋਵੇਂ ਦੋਸ਼ੀਆਂ ਤੋਂ ਪੁੱਛਗਿੱਛ ਜਾਰੀ ਹੈ ਅਤੇ ਪੁਲਿਸ ਨੂੰ ਉਮੀਦ ਹੈ ਕਿ ਇਸ ਰੈਕੇਟ ਨਾਲ ਜੁੜੇ ਹੋਰ ਲੋਕਾਂ ਬਾਰੇ ਵੀ ਅਹਿਮ ਖੁਲਾਸੇ ਹੋਣਗੇ। ਇਹ ਮਾਮਲਾ ਸਿਹਤ ਪ੍ਰਣਾਲੀ ਵਿੱਚ ਵੱਡੀ ਸੇਂਧ ਅਤੇ ਸਰਕਾਰੀ ਪ੍ਰਕਿਰਿਆਵਾਂ ਦੀ ਦੁਰਵਰਤੋਂ ਦਾ ਉਦਾਹਰਨ ਮੰਨਿਆ ਜਾ ਰਿਹਾ ਹੈ।
- PTC NEWS
