Terrorist Attack : ਕਾਂਗੋ 'ਚ ਚਰਚ 'ਤੇ ਅੱਤਵਾਦੀ ਹਮਲਾ, IS ਸਮਰਥਕ ਅੱਤਵਾਦੀਆਂ ਦੇ ਹਮਲੇ 'ਚ 21 ਲੋਕਾਂ ਦੀ ਮੌਤ, ਕਈ ਘਰ ਤੇ ਦੁਕਾਨਾਂ ਰਾਖ
Terrorist Attack : ਐਤਵਾਰ ਨੂੰ, ਇਸਲਾਮਿਕ ਸਟੇਟ ਨਾਲ ਜੁੜੇ ਬਾਗੀ ਸਮੂਹ ADF (ਅਲਾਈਡ ਡੈਮੋਕ੍ਰੇਟਿਕ ਫੋਰਸਿਜ਼) ਨੇ ਪੂਰਬੀ ਕਾਂਗੋ ਦੇ ਕੋਮਾਂਡਾ ਖੇਤਰ ਵਿੱਚ ਇੱਕ ਕੈਥੋਲਿਕ ਚਰਚ ਦੇ ਅਹਾਤੇ 'ਤੇ ਹਮਲਾ ਕੀਤਾ। ਇਸ ਹਮਲੇ ਵਿੱਚ ਘੱਟੋ-ਘੱਟ 21 ਲੋਕ ਮਾਰੇ ਗਏ।
ਮੀਡੀਆ ਰਿਪੋਰਟਾਂ ਅਨੁਸਾਰ, ਸਥਾਨਕ ਸਮਾਜਿਕ ਕਾਰਕੁਨ ਡਾਇਓਡੋਨੇਟ ਦੁਰੰਥਾਬੋ ਨੇ ਕਿਹਾ ਕਿ ਹਮਲਾ ਸਵੇਰੇ 1 ਵਜੇ ਦੇ ਕਰੀਬ ਹੋਇਆ। ਹਮਲਾਵਰਾਂ ਨੇ ਚਰਚ ਦੇ ਅੰਦਰ ਅਤੇ ਬਾਹਰ ਗੋਲੀਆਂ ਚਲਾਈਆਂ। ਕਈ ਦੁਕਾਨਾਂ ਅਤੇ ਘਰਾਂ ਨੂੰ ਵੀ ਅੱਗ ਲਗਾ ਦਿੱਤੀ ਗਈ। ਉਨ੍ਹਾਂ ਕਿਹਾ, "21 ਤੋਂ ਵੱਧ ਲੋਕਾਂ ਨੂੰ ਗੋਲੀ ਮਾਰ ਦਿੱਤੀ ਗਈ ਹੈ। ਘੱਟੋ-ਘੱਟ ਤਿੰਨ ਸੜੀਆਂ ਹੋਈਆਂ ਲਾਸ਼ਾਂ ਮਿਲੀਆਂ ਹਨ, ਅਤੇ ਭਾਲ ਜਾਰੀ ਹੈ।"
ਕਾਂਗੋਲੀ ਫੌਜ ਦੇ ਬੁਲਾਰੇ ਲੈਫਟੀਨੈਂਟ ਜੂਲਸ ਨਗੋਂਗੋ ਨੇ ਕਿਹਾ ਕਿ ਚਰਚ ਵਿੱਚ ਲਗਭਗ 10 ਲੋਕ ਮਾਰੇ ਗਏ ਅਤੇ ਕਈ ਦੁਕਾਨਾਂ ਸਾੜ ਦਿੱਤੀਆਂ ਗਈਆਂ।
ADF ਯੂਗਾਂਡਾ ਅਤੇ ਕਾਂਗੋ ਦੀ ਸਰਹੱਦ 'ਤੇ ਸਰਗਰਮ ਇੱਕ ਬਾਗੀ ਸਮੂਹ ਹੈ। ਇਹ ਸਮੂਹ ਪਿਛਲੇ ਕਈ ਸਾਲਾਂ ਤੋਂ ਆਮ ਲੋਕਾਂ 'ਤੇ ਹਮਲੇ ਕਰ ਰਿਹਾ ਹੈ ਅਤੇ ਇਸਲਾਮਿਕ ਸਟੇਟ ਨਾਲ ਜੁੜਿਆ ਹੋਇਆ ਹੈ।
ਕੋਮਾਂਡਾ ਵਿੱਚ ਘਟਨਾ ਸਥਾਨ 'ਤੇ ਮੌਜੂਦ ਇੱਕ ਮਨੁੱਖੀ ਅਧਿਕਾਰ ਕਾਰਕੁਨ ਕ੍ਰਿਸਟੋਫ਼ ਮੁਨਯਾਂਡੇਰੂ ਨੇ ਕਿਹਾ, "ਬਾਗ਼ੀਆਂ ਨੇ ਮੁੱਖ ਤੌਰ 'ਤੇ ਉਨ੍ਹਾਂ ਈਸਾਈਆਂ 'ਤੇ ਹਮਲਾ ਕੀਤਾ, ਜੋ ਇੱਕ ਕੈਥੋਲਿਕ ਚਰਚ ਵਿੱਚ ਰਾਤ ਬਿਤਾ ਰਹੇ ਸਨ। ਇਨ੍ਹਾਂ ਲੋਕਾਂ ਨੂੰ ਕੁਹਾੜੀਆਂ ਜਾਂ ਗੋਲੀਆਂ ਨਾਲ ਮਾਰਿਆ ਗਿਆ।" ਡੀਆਰਸੀ ਦੇ ਰੇਡੀਓ ਓਕਾਪੀ ਨੇ ਏਡੀਐਫ ਨੂੰ ਦੋਸ਼ੀ ਠਹਿਰਾਇਆ। ਰੇਡੀਓ ਨੇ ਕਿਹਾ, "ਇੱਕ ਚਰਚ ਵਿੱਚ ਪ੍ਰਾਰਥਨਾ ਸੇਵਾ ਦੌਰਾਨ 20 ਤੋਂ ਵੱਧ ਪੀੜਤਾਂ ਨੂੰ ਤੇਜ਼ਧਾਰ ਹਥਿਆਰਾਂ ਨਾਲ ਮਾਰਿਆ ਗਿਆ।" ਹੋਰ ਲਾਸ਼ਾਂ ਨੇੜੇ ਦੇ ਸੜੇ ਹੋਏ ਘਰਾਂ ਵਿੱਚ ਮਿਲੀਆਂ।
- PTC NEWS
