Lucky Oberoi ਕਤਲ ਕਾਂਡ 'ਚ ਸ਼ੂਟਰ ਦੀ ਫੋਟੋ ਆਈ ਸਾਹਮਣੇ ,ਦੋਵੇਂ ਹੱਥਾਂ ਨਾਲ ਗੋਲੀ ਚਲਾਉਣ ਦਾ ਮਾਹਰ
Lucky Oberoi Murder Case : ਜਲੰਧਰ 'ਚ ਆਮ ਆਦਮੀ ਪਾਰਟੀ ਦੇ ਨੇਤਾ ਲੱਕੀ ਓਬਰਾਏ ਦੇ ਕਤਲ ਕਾਂਡ ਵਿੱਚ ਨਵਾਂ ਅੱਪਡੇਟ ਆਇਆ ਹੈ। ਪੁਲਿਸ ਜਾਂਚ ਅਤੇ ਬਹਿਰਾਮ ਟੋਲ ਪਲਾਜ਼ਾ ਦੇ ਸੀਸੀਟੀਵੀ ਫੁਟੇਜ ਤੋਂ ਪੁਸ਼ਟੀ ਹੋਈ ਹੈ ਕਿ ਇਸ ਵਾਰਦਾਤ ਨੂੰ ਅੰਜ਼ਾਮ ਦੇਣ ਵਾਲਾ ਸ਼ੂਟਰ ਸੋਨੂੰ ਖੱਤਰੀ ਗੈਂਗ ਦਾ ਮੈਂਬਰ ਗੁਰਤਾਜ ਸਿੰਘ ਹੈ। ਗੁਰਤਾਜ ਨੇ ਦੋ ਮਹੀਨਿਆਂ ਦੇ ਅੰਦਰ ਦੋ ਕਤਲ ਕੀਤੇ ਹਨ। ਇਸ ਵੇਲੇ ਪੁਲਿਸ ਅਤੇ ਕਈ ਜਾਂਚ ਏਜੰਸੀਆਂ ਉਸਦੀ ਭਾਲ ਕਰ ਰਹੀਆਂ ਹਨ।
ਸ਼ੁਰੂਆਤ 'ਚ ਪੁਲਿਸ ਇਸ ਮਾਮਲੇ ਵਿੱਚ ਅਰਜੁਨ ਅਤੇ ਉਸਦੇ ਭਰਾ ਨੂੰ ਸ਼ੱਕੀ ਮੰਨ ਰਹੀ ਸੀ। ਹਾਲਾਂਕਿ ਬਹਿਰਾਮ ਟੋਲ ਪਲਾਜ਼ਾ ਦੇ ਸੀਸੀਟੀਵੀ ਕੈਮਰਿਆਂ ਨਾਲ ਤਸਵੀਰ ਸਾਫ਼ ਹੋ ਗਈ ਹੈ। ਸੀਸੀਟੀਵੀ ਫੁਟੇਜ ਵਿੱਚ ਸ਼ੂਟਰ ਗੁਰਤਾਜ ਸਿੰਘ ਕ੍ਰੇਟਾ ਕਾਰ ਚਲਾਉਂਦਾ ਦਿਖਾਈ ਦੇ ਰਿਹਾ ਹੈ। ਗੁਰਤਾਜ ਹੁਸ਼ਿਆਰਪੁਰ ਦੀ ਐਮਐਕਸ ਕਲੋਨੀ ਦਾ ਰਹਿਣ ਵਾਲਾ ਹੈ। ਗੁਰਤਾਜ ਅਪਰਾਧੀਆਂ ਵਿੱਚ ਆਪਣੇ ਵਿਲੱਖਣ ਫਾਇਰਿੰਗ ਸਟਾਈਲ ਲਈ ਜਾਣਿਆ ਜਾਂਦਾ ਹੈ। ਉਸਨੂੰ ਦੋਵਾਂ ਹੱਥਾਂ ਨਾਲ ਪਿਸਟਲ ਚਲਾ ਕੇ ਸਟੀਕ ਨਿਸ਼ਾਨਾ ਲਗਾਉਣ ਦਾ ਮਾਹਰ ਮੰਨਿਆ ਜਾਂਦਾ ਹੈ।
ਜਾਂਚ ਤੋਂ ਪਤਾ ਲੱਗਾ ਕਿ ਸ਼ੂਟਰ ਸ਼ਹਿਰ ਦੇ ਰੂਟਾਂ ਤੋਂ ਅਣਜਾਣ ਸੀ। ਲੱਕੀ ਓਬਰਾਏ ਦੇ ਨੌਕਰ ਸ਼ਮਿੰਦਰ ਸਿੰਘ ਉਰਫ਼ ਸ਼ਿੰਗਾਰੀ ਨੇ ਉਸਨੂੰ ਡੀਸੀ ਕਲੋਨੀ ਤੋਂ ਸ਼ਹਿਰ ਦੇ ਬਾਹਰੀ ਹਿੱਸੇ ਤੱਕ ਦਾ ਰਸਤਾ ਦਿਖਾਇਆ। ਸ਼ਿੰਗਾਰੀ ਕਾਰ ਚਲਾ ਰਿਹਾ ਸੀ ਅਤੇ ਸ਼ੂਟਰ ਪਿੱਛੇ ਸਕੂਟਰੀ 'ਤੇ ਸੀ। ਸ਼ਹਿਰ ਤੋਂ ਬਾਹਰ ਨਿਕਲਣ ਤੋਂ ਬਾਅਦ ਗੁਰਤਾਜ ਨੇ ਕਾਰ ਫੜ ਲਈ ਅਤੇ ਸਕੂਟਰੀ ਨੂੰ ਰਸਤੇ ਵਿੱਚ ਕਿਤੇ ਲੁਕਾ ਦਿੱਤਾ।
ਕਤਲ ਵਿੱਚ ਵਰਤੀ ਗਈ ਚਿੱਟੀ ਕ੍ਰੇਟਾ ਕਾਰ ਪੁਲਿਸ ਨੇ ਬਲਾਚੌਰ ਖੇਤਰ ਤੋਂ ਬਰਾਮਦ ਕੀਤੀ ਹੈ। ਹੈਰਾਨੀ ਦੀ ਗੱਲ ਹੈ ਕਿ ਇਹ ਕਾਰ ਚੋਰੀ ਦੀ ਸੀ ,ਜਿਸਨੂੰ ਜੀਐਸ ਅਰੋੜਾ ਨਾਮ ਦੇ ਇੱਕ ਵਿਅਕਤੀ ਨੇ ਲੱਕੀ ਓਬਰਾਏ ਕੋਲ 2.40 ਲੱਖ ਵਿੱਚ ਗਿਰਵੀ ਰੱਖੀ ਸੀ। ਕਤਲ ਤੋਂ ਸਿਰਫ਼ ਇੱਕ ਦਿਨ ਪਹਿਲਾਂ ਨੌਕਰ, ਸ਼ਿੰਗਾਰੀ ਨੇ ਲੱਕੀ ਤੋਂ ਕਾਰ ਮੰਗੀ ਸੀ।
ਅੰਮ੍ਰਿਤਸਰ ਨੇੜੇ ਇੱਕ ਮੁਕਾਬਲੇ ਤੋਂ ਬਾਅਦ ਪੁਲਿਸ ਨੇ ਸਾਜ਼ਿਸ਼ ਰਚਣ ਵਾਲੇ ਨੌਕਰ ਸ਼ਿੰਗਾਰੀ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਪੁੱਛਗਿੱਛ ਦੌਰਾਨ ਸ਼ਿੰਗਾਰੀ ਨੇ ਖੁਲਾਸਾ ਕੀਤਾ ਕਿ ਲੱਕੀ ਓਬਰਾਏ ਨੇ ਉਸਨੂੰ ਕੁੱਟਿਆ ਸੀ ਅਤੇ ਇਸਦਾ ਬਦਲਾ ਲੈਣ ਲਈ ਉਹ ਅਮਰੀਕਾ ਵਿੱਚ ਰਹਿਣ ਵਾਲੇ ਜੋਗਾ ਫੋਲਡੀਵਾਲ ਦੀ ਸਾਜ਼ਿਸ਼ ਵਿੱਚ ਸ਼ਾਮਲ ਹੋ ਗਿਆ ਸੀ। ਜੋਗਾ ਨੇ ਪੂਰੇ ਕਤਲ ਦੀ ਜ਼ਿੰਮੇਵਾਰੀ ਲਈ ਹੈ।
- PTC NEWS
