ਝੋਨਾ ਲਾਉਣ ਵਾਲੇ ਪ੍ਰਵਾਸੀ ਮਜ਼ਦੂਰ ਘਟੇ ,ਕਿਸਾਨ ਰੇਲਵੇ ਸਟੇਸ਼ਨਾਂ 'ਤੇ ਕਰ ਰਹੇ ਨੇ ਪ੍ਰਵਾਸੀ ਮਜ਼ਦੂਰਾਂ ਦਾ ਇੰਤਜ਼ਾਰ
ਝੋਨਾ ਲਾਉਣ ਵਾਲੇ ਪ੍ਰਵਾਸੀ ਮਜ਼ਦੂਰ ਘਟੇ ,ਕਿਸਾਨ ਰੇਲਵੇ ਸਟੇਸ਼ਨਾਂ 'ਤੇ ਕਰ ਰਹੇ ਨੇ ਪ੍ਰਵਾਸੀ ਮਜ਼ਦੂਰਾਂ ਦਾ ਇੰਤਜ਼ਾਰ:ਇਸ ਵਾਰ ਜੀਰੀ ਲਾਉਣ ਵਾਲੇ ਪ੍ਰਵਾਸੀ ਮਜ਼ਦੂਰਾਂ ਦੀ ਆਮਦ ਬਹੁਤ ਘੱਟ ਹੋਈ ਹੈ।ਇਸ ਲਈ ਕਿਸਾਨਾਂ ਨੂੰ ਇਧਰਲੇ(ਪੰਜਾਬੀ) ਮਜ਼ਦੂਰਾਂ ਤੋਂ ਜੀਰੀ ਲਵਾਉਣ ਲਈ ਮਜਬੂਰ ਹੋਣਾ ਪੈ ਰਿਹਾ ਹੈ ਪਰ ਕਿਸਾਨਾਂ ਦੀ ਇੱਛਾ ਇਹ ਹੀ ਹੁੰਦੀ ਹੈ ਕਿ ਭਾਵੇਂ ਚਾਰ ਪੈਸੇ ਵੱਧ ਖਰਚ ਹੋ ਜਾਣ ਪਰ ਜੀਰੀ ਲਵਾਉਣ ਲਈ ਪ੍ਰਵਾਸੀ ਮਜ਼ਦੂਰ ਹੀ ਮਿਲਣ।ਇਹ ਵੱਖਰੀ ਗੱਲ ਹੈ ਕਿ ਹੁਣ ਲੰਮੇ ਸਮੇਂ ਤੋਂ ਪੰਜਾਬ ਵਿੱਚ ਜੀਰੀ ਲੱਗਣ ਕਾਰਨ ਇਧਰਲੇ ਮਜ਼ਦੂਰਾਂ ਦੀ ਲਵਾਈ ਵੀ ਬਾਹਰਲੇ ਮਜ਼ਦੂਰਾਂ ਨਾਲੋਂ ਘੱਟ ਨਹੀਂ ਰਹੀ।ਪ੍ਰਵਾਸੀ ਮਜ਼ਦੂਰਾਂ ਦੇ ਘੱਟ ਆਉਣ ਕਾਰਨ ਪੰਜਾਬ ਸਰਕਾਰ ਵੱਲੋਂ ਇਸ ਵਾਰ 20 ਜੂਨ ਕਰਨ ਨਾਲ ਪ੍ਰਵਾਸੀ ਮਜ਼ਦੂਰ ਘੱਟ ਆਏ ਹਨ ਕਿਉਂਕਿ ਹੁਣ ਇਹ ਸਖ਼ਤੀ ਹੋ ਜਾਣ ਕਾਰਨ ਪ੍ਰਵਾਸੀ ਮਜ਼ਦੂਰਾਂ ਲਈ ਇਧਰ ਜੀਰੀ ਲਾਉਣ ਦਾ ਸੀਜ਼ਨ ਸਿਰਫ ਦਸ,ਪੰਦਰਾਂ ਦਿਨ ਦਾ ਹੋ ਕੇ ਰਹਿ ਗਿਆ ਹੈ,ਜਦੋਂਕਿ ਪਿਛਲੀ ਵਾਰ ਇਹ 10 ਜੂਨ ਦਾ ਹੋਣ ਕਾਰਨ ਇਹ ਵੀਹ ਦਿਨ ਦਾ ਸੀ।ਸੰਗਰੂਰ ਦੇ ਪਿੰਡ ਪੁੰਨਾਵਾਲ ਵਿਖੇ ਪ੍ਰਵਾਸੀ ਮਜ਼ਦੂਰ ਕਦਮ ਲਾਲ (ਬਿਹਾਰ) ਨੇ ਦੱਸਿਆ ਕਿ ਸਾਡੇ ਪਿੰਡ ਦੇ ਮਜ਼ਦੂਰ ਇਸ ਲਈ ਨਹੀਂ ਆਏ ਕਿਉਂਕਿ ਝੌਨੇ ਦੀ ਲਵਾਈ ਘੱਟ ਦਿਨ ਹੋਣ ਕਾਰਨ ਉਨ੍ਹਾਂ ਨੂੰ ਬਚੱਤ ਘੱਟ ਹੁੰਦੀ ਹੈ।ਕੰਮ ਮਸਾਂ ਹੀ ਦਸ ਪੰਦਰਾਂ ਦਿਨ ਚਲਦਾ ਹੈ ਚਾਰ ਦਿਨ ਆਉਣ ਜਾਣ ਦੇ ਲਗਦੇ ਹਨ।ਰਸਤੇ ਵਿੱਚ ਖਾਣਾ ਵੀ ਪਲਿਓਂ ਖਾਣਾ ਪੈਂਦਾ ਹੈ ਅਤੇ ਇਧਰ ਆ ਕੇ ਦੂਜੇ ਦਿਨ ਕੰਮ ਸ਼ੂਰੁ ਹੁੰਦਾ ਹੈ।ਇਸ ਤੋਂ ਇਲਾਵਾ ਪੰਜਾਬ ਦੇ ਵਿੱਚ ਝੋਨਾ ਲੇਟ ਹੋਣ ਕਾਰਨ ਉਹ ਹੋਰਨਾਂ ਰਾਜਾਂ ਦੇ ਵਿੱਚ ਚਲੇ ਗਏ ਹਨ।ਸੰਗਰੂਰ ਦੇ ਪਿੰਡ ਬਡਰੁੱਖਾਂ ਦੇ ਕਿਸਾਨ ਜੁਝਾਰ ਸਿੰਘ ਨੇ ਦੱਸਿਆ ਕਿ ਪ੍ਰਵਾਸੀ ਮਜ਼ਦੂਰ ਘੱਟ ਆਉਣ ਕਾਰਨ ਝੋਨੇ ਦੀ ਲਵਾਈ 2500 ਤੋਂ 3000 ਰੁਪਏ ਪ੍ਰਤੀ ਏਕੜ ਹੋ ਗਈ ਹੈ ਜਦੋਂਕਿ ਪਿਛਲੇ ਸਾਲ ਇਹ ਰੇਟ 2500 ਰੁਪਏ ਸੀ।ਉਨ੍ਹਾਂ ਇਹ ਵੀ ਦੱਸਿਆ ਕਿ ਭਾਵੇਂ ਇਧਰਲੇ ਮਜ਼ਦੂਰ ਵੀ ਠੇਕਾ ਕਰਦੇ ਹਨ ਪਰ ਪ੍ਰਵਾਸੀ ਮਜ਼ਦੂਰ ਕੰਮ ਛੇਤੀ ਨਿਬੇੜਦੇ ਹਨ।ਕਿਸਾਨ ਜੁਝਾਰ ਸਿੰਘ ਨੇ ਦੱਸਿਆ ਕਿ ਸਰਕਾਰ ਵੱਲੋਂ ਝੋਨਾ ਲਗਾਉਣ ਦੇ ਲਈ 20 ਜੂਨ ਦਾ ਸਮਾਂ ਤੈਅ ਕੀਤਾ ਗਿਆ ਸੀ।ਇਨ੍ਹਾਂ ਦਿਨਾਂ ਦੇ ਵਿੱਚ ਮੀਂਹ ਪੈਣ ਦੇ ਨਾਲ ਇਕਦਮ ਝੋਨਾ ਲਗਾਉਣ ਦਾ ਜ਼ੋਰ ਪੈ ਗਿਆ ਹੈ,ਜਿਸ ਦੇ ਲਈ ਪ੍ਰਵਾਸੀ ਮਜ਼ਦੂਰ ਮਿਲ ਨਹੀਂ ਰਹੇ ਤੇ ਇਧਰਲੇ (ਪੰਜਾਬੀ) ਮਜ਼ਦੂਰਾਂ ਤੋਂ ਹੀ ਝੋਨਾ ਲਵਾਉਣ ਲਈ ਮਜਬੂਰ ਹੋਣਾ ਪੈ ਰਿਹਾ ਹੈ।ਉਨ੍ਹਾਂ ਦੱਸਿਆ ਕਿ ਕਿਸਾਨ ਰੇਲਵੇ ਸਟੇਸ਼ਨਾਂ 'ਤੇ ਪ੍ਰਵਾਸੀ ਮਜ਼ਦੂਰਾਂ ਦਾ ਇੰਤਜ਼ਾਰ ਕਰ ਰਹੇ ਹਨ। Written and Edited by Shanker Badra for PTC News -PTCNews