ਧੂਰੀ ਰੇਲਗੱਡੀ ਵਿੱਚ ਖੂਨ ਨਾਲ ਲੱਥ ਪੱਥ ਸੂਟਕੇਸ ਚੋਂ ਮਿਲੀਆਂ ਔਰਤ ਅਤੇ ਬੱਚੀ ਦੀਆਂ ਲਾਸ਼ਾਂ
ਧੂਰੀ ਰੇਲਗੱਡੀ ਵਿੱਚ ਖੂਨ ਨਾਲ ਲੱਥ ਪੱਥ ਸੂਟਕੇਸ ਚੋਂ ਮਿਲੀਆਂ ਔਰਤ ਅਤੇ ਬੱਚੀ ਦੀਆਂ ਲਾਸ਼ਾਂ:ਧੂਰੀ ਰੇਲਵੇ ਸਟੇਸ਼ਨ 'ਤੇ ਰੇਲਗੱਡੀ ਵਿਚੋਂ ਸੂਟਕੇਸ ਅੰਦਰੋਂ ਇੱਕ ਔਰਤ ਅਤੇ ਕਰੀਬ 6 ਮਹੀਨੇ ਦੀ ਬੱਚੀ ਦੀਆਂ ਲਾਸ਼ਾਂ ਮਿਲੀਆਂ ਹਨ।
ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਰੇਲਵੇ ਸਟੇਸ਼ਨ ਧੂਰੀ ਦੇ ਚੌਕੀ ਇੰਚਾਰਜ ਸਹਾਇਕ ਥਾਣੇਦਾਰ ਜਗਜੀਤ ਸਿੰਘ ਨੇ ਦੱਸਿਆ ਕਿ ਦਾਦਰ ਤੋਂ ਅੰਮ੍ਰਿਤਸਰ ਜਾਣ ਵਾਲੀ ਰੇਲਗੱਡੀ ਦੇ ਐਸਕਾਰਟ ਇੰਚਾਰਜ ਹੈੱਡ ਕਾਂਸਟੇਬਲ ਬਗੀਚਾ ਸਿੰਘ ਨੇ ਉਨ੍ਹਾਂ ਨੂੰ ਫ਼ੋਨ 'ਤੇ ਸੂਚਨਾ ਦਿੱਤੀ ਸੀ ਕਿ ਗੱਡੀ ਦਾਦਰ-ਅੰਮ੍ਰਿਤਸਰ ਐਕਸਪ੍ਰੈੱਸ ਰੇਲਗੱਡੀ ਦੇ ਐਸ-4 ਡੱਬੇ ਵਿਚ ਇੱਕ ਲਾਵਾਰਸ ਸੂਟਕੇਸ ਪਿਆ ਹੈ।
ਜਦੋਂ ਗੱਡੀ ਦੇ ਧੂਰੀ ਸਟੇਸ਼ਨ ਉੱਪਰ ਪਹੁੰਚਣ 'ਤੇ ਇਹ ਸੂਟਕੇਸ ਉਤਾਰਿਆ ਗਿਆ ਤਾਂ ਇਸ ਸੂਟਕੇਸ ਉੱਪਰ ਕਾਫੀ ਮੱਖੀਆਂ ਭਿਣਕ ਰਹੀਆਂ ਸਨ,ਜਿਸ ਕਾਰਨ ਸ਼ੰਕਾ ਦੇ ਚੱਲਦਿਆਂ ਜੀ.ਆਰ.ਪੀ. ਦੇ ਥਾਣਾ ਇੰਚਾਰਜ ਸੰਗਰੂਰ ਚਰਨਦੀਪ ਸਿੰਘ ਦੀ ਹਾਜ਼ਰੀ ਵਿਚ ਇਸ ਸੂਟਕੇਸ ਦਾ ਜਿੰਦਰਾ ਤੋੜਿਆ ਗਿਆ ਤਾਂ ਇਸ ਵਿਚੋਂ ਅਰਧ-ਨਗਨ ਸਾੜੀ ਵਿਚ ਲਿਪਟੀ ਇੱਕ 23-24 ਸਾਲਾ ਔਰਤ ਅਤੇ ਇੱਕ 6 ਕੁ ਮਹੀਨੇ ਦੀ ਬੱਚੀ ਦੀ ਲਾਸ਼ ਬਰਾਮਦ ਹੋਈ।
ਉਨ੍ਹਾਂ ਦੱਸਿਆ ਕਿ ਮ੍ਰਿਤਕ ਔਰਤ ਦੇ ਸਿਰ ਵਿਚ ਸੱਟ ਦਾ ਡੂੰਘਾ ਨਿਸ਼ਾਨ ਸੀ ਅਤੇ ਉਸ ਦੀ ਬਾਂਹ 'ਤੇ ਅੰਗਰੇਜ਼ੀ ਵਿਚ ਕਿਰਨ ਬਾਈ ਉੱਕਰਿਆ ਹੋਇਆ ਸੀ।ਉਨ੍ਹਾਂ ਦੱਸਿਆ ਕਿ ਦੋਵਾਂ ਲਾਸ਼ਾਂ ਨੂੰ ਪੋਸਟਮਾਰਟਮ ਲਈ ਸਿਵਲ ਹਸਪਤਾਲ ਧੂਰੀ ਭੇਜ ਦਿੱਤਾ ਗਿਆ ਹੈ ਅਤੇ ਜੀ.ਆਰ.ਪੀ. ਵੱਲੋਂ ਇਸ ਮਾਮਲੇ ਵਿਚ ਕਤਲ ਦੇ ਦੋਸ਼ ਹੇਠ ਅਣਪਛਾਤੇ ਦੋਸ਼ੀਆਂ ਖਿਲਾਫ ਮੁਕੱਦਮਾ ਦਰਜ ਕਰਕੇ ਇਹਨਾਂ ਦੀ ਪਛਾਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
-PTCNews
