Gopal Khemka Murder : ਪੁਲਿਸ ਮੁਕਾਬਲੇ 'ਚ ਆਰੋਪੀ ਵਿਕਾਸ ਢੇਰ , ਗੋਪਾਲ ਖੇਮਕਾ ਕਤਲ ਕੇਸ 'ਚ ਸਪਲਾਈ ਕੀਤੇ ਸੀ ਹਥਿਆਰ
Gopal Khemka Murder : ਬਿਹਾਰ ਦੇ ਪਟਨਾ ਵਿੱਚ ਵੱਡੇ ਉਦਯੋਗਪਤੀ ਗੋਪਾਲ ਖੇਮਕਾ ਦੇ ਕਤਲ ਕੇਸ ਵਿੱਚ ਪੁਲਿਸ ਨੂੰ ਇੱਕ ਹੋਰ ਸਫਲਤਾ ਮਿਲੀ ਹੈ। ਦਰਅਸਲ, ਪਟਨਾ ਸ਼ਹਿਰ ਦੇ ਮਾਲ ਸਲਾਮੀ ਇਲਾਕੇ ਵਿੱਚ ਪੁਲਿਸ ਨਾਲ ਹੋਏ ਮੁਕਾਬਲੇ ਵਿੱਚ ਅਪਰਾਧੀ ਵਿਕਾਸ ਉਰਫ ਰਾਜਾ ਮਾਰਿਆ ਗਿਆ ਹੈ। ਵਿਕਾਸ ਉਰਫ ਰਾਜਾ ਨੇ ਖੇਮਕਾ ਦੇ ਕਤਲ ਲਈ ਹਥਿਆਰ ਮੁਹੱਈਆ ਕਰਵਾਏ ਸਨ। ਮੀਡੀਆ ਰਿਪੋਰਟਾਂ ਅਨੁਸਾਰ ਦੱਸਿਆ ਜਾ ਰਿਹਾ ਹੈ ਕਿ ਘਟਨਾ ਸਮੇਂ ਵਿਕਾਸ ਵੀ ਉਮੇਸ਼ ਦੇ ਨਾਲ ਮੌਜੂਦ ਸੀ।
ਇਹ ਜਾਣਕਾਰੀ ਮਿਲਣ 'ਤੇ ਜਦੋਂ ਪੁਲਿਸ ਉਸਨੂੰ ਗ੍ਰਿਫ਼ਤਾਰ ਕਰਨ ਪਹੁੰਚੀ ਤਾਂ ਉਸਨੇ ਪੁਲਿਸ ਵਾਲਿਆਂ 'ਤੇ ਗੋਲੀਆਂ ਚਲਾਉਣੀਆਂ ਸ਼ੁਰੂ ਕਰ ਦਿੱਤੀਆਂ। ਜਵਾਬੀ ਗੋਲੀਬਾਰੀ ਦੌਰਾਨ ਉਸਨੂੰ ਪੁਲਿਸ ਦੀ ਗੋਲੀ ਲੱਗ ਗਈ। ਜਿਸ ਕਾਰਨ ਉਸਦੀ ਮੌਤ ਹੋ ਗਈ। ਪੁਲਿਸ ਮਾਮਲੇ ਵਿੱਚ ਅੱਗੇ ਦੀ ਕਾਰਵਾਈ ਕਰ ਰਹੀ ਹੈ। ਇਸ ਕਤਲ ਕੇਸ ਵਿੱਚ ਪਹਿਲਾਂ ਸ਼ਹਿਰ ਤੋਂ ਉਮੇਸ਼ ਕੁਮਾਰ ਨਾਮ ਦੇ ਇੱਕ ਸ਼ੂਟਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਸੀ, ਜਿਸਨੂੰ ਇਸ ਸਨਸਨੀਖੇਜ਼ ਕਤਲ ਵਿੱਚ ਸ਼ਾਮਲ ਮੁੱਖ ਮੁਲਜ਼ਮਾਂ ਵਿੱਚੋਂ ਇੱਕ ਦੱਸਿਆ ਜਾਂਦਾ ਸੀ।
ਦੱਸਿਆ ਜਾ ਰਿਹਾ ਹੈ ਕਿ ਉਮੇਸ਼ ਕੁਮਾਰ ਉਰਫ਼ ਵਿਜੇ ਸਾਹਨੀ ਪਟਨਾ ਸ਼ਹਿਰ ਦੇ ਮਾਲ ਸਲਾਮੀ ਦਾ ਰਹਿਣ ਵਾਲਾ ਹੈ। ਅੰਦਰੂਨੀ ਜਾਣਕਾਰੀ ਅਨੁਸਾਰ ਘਟਨਾ ਵਿੱਚ ਵਰਤਿਆ ਗਿਆ ਦੋਪਹੀਆ ਵਾਹਨ, ਹਥਿਆਰ ਅਤੇ ਸੁਪਾਰੀ ਵਜੋਂ ਦਿੱਤੇ ਗਏ ਲਗਭਗ ਤਿੰਨ ਲੱਖ ਰੁਪਏ ਵੀ ਬਰਾਮਦ ਕੀਤੇ ਗਏ ਹਨ।
ਇਹ ਵੀ ਜਾਣਕਾਰੀ ਮਿਲ ਰਹੀ ਹੈ ਕਿ ਹੱਤਿਆ ਦੀ ਸੁਪਾਰੀ ਦੇਣ ਵਾਲਾ ਵਿਅਕਤੀ ਨਾਲੰਦਾ ਦਾ ਰਹਿਣ ਵਾਲਾ ਅਸ਼ੋਕ ਸਾਓ ਹੈ, ਜੋ ਅਜੇ ਵੀ ਪੁਲਿਸ ਦੀ ਪਕੜ ਤੋਂ ਬਾਹਰ ਹੈ। ਪੁਲਿਸ ਟੀਮ ਉਸਨੂੰ ਗ੍ਰਿਫ਼ਤਾਰ ਕਰਨ ਲਈ ਉਸਦੇ ਵੱਖ-ਵੱਖ ਟਿਕਾਣਿਆਂ 'ਤੇ ਛਾਪੇਮਾਰੀ ਕਰ ਰਹੀ ਹੈ। ਫਿਲਹਾਲ ਪੁਲਿਸ ਉਮੇਸ਼ ਕੁਮਾਰ ਉਰਫ਼ ਵਿਜੇ ਸਾਹਨੀ ਤੋਂ ਪੁੱਛਗਿੱਛ ਕਰ ਰਹੀ ਹੈ।
- PTC NEWS
