Chandigarh New Excise Policy 2026-27 : ਹੁਣ ਚੰਡੀਗੜ੍ਹ ਦੇ ਪੈਟਰੋਲ ਪੰਪਾਂ ਤੇ ਡਿਪਾਰਟਮੈਂਟਲ ਸਟੋਰਾਂ 'ਤੇ ਵੇਚੀ ਜਾਵੇਗੀ ਸ਼ਰਾਬ !
Chandigarh Excise Policy 2026-27 News : ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਸਾਲ 2026-27 ਲਈ ਇੱਕ ਨਵੀਂ ਆਬਕਾਰੀ ਨੀਤੀ ਜਾਰੀ ਕੀਤੀ ਹੈ। ਮੰਗਲਵਾਰ ਦੇਰ ਰਾਤ ਜਾਰੀ ਕੀਤੀ ਗਈ ਇਸ ਨੀਤੀ ਵਿੱਚ ਸ਼ਰਾਬ ਦੇ ਠੇਕੇ, ਬਾਰ ਲਾਇਸੈਂਸ, ਹੋਟਲਾਂ ਅਤੇ ਰੈਸਟੋਰੈਂਟਾਂ ਵਿੱਚ ਸ਼ਰਾਬ ਪਰੋਸਣ, ਮਾਈਕ੍ਰੋ-ਬਰੂਅਰੀਆਂ, ਟੇਵਰਨ ਅਤੇ ਲਾਇਸੈਂਸ ਫੀਸਾਂ ਨਾਲ ਸਬੰਧਤ ਕਈ ਮਹੱਤਵਪੂਰਨ ਪ੍ਰਬੰਧ ਸ਼ਾਮਲ ਹਨ। ਨਵੀਂ ਨੀਤੀ ਦੇ ਤਹਿਤ, ਸ਼ਰਾਬ ਵਿਕਰੀ ਲਾਇਸੈਂਸ, ਬਾਰ ਦੇ ਕੰਮਕਾਜ ਦੇ ਘੰਟੇ, ਭੁਗਤਾਨ ਪ੍ਰਣਾਲੀਆਂ ਅਤੇ ਸੁਰੱਖਿਆ ਮਾਪਦੰਡਾਂ ਸੰਬੰਧੀ ਕਈ ਨਵੀਆਂ ਸ਼ਰਤਾਂ ਲਾਗੂ ਕੀਤੀਆਂ ਗਈਆਂ ਹਨ।
ਪੈਟਰੋਲ ਪੰਪਾਂ ’ਤੇ ਵੇਚੀ ਜਾਵੇਗੀ ਸ਼ਰਾਬ
ਚੰਡੀਗੜ੍ਹ ਦੇ ਪੈਟਰੋਲ ਪੰਪਾਂ ਤੇ ਡਿਪਾਰਟਮੈਂਟਲ ਸਟੋਰਾਂ ’ਤੇ ਵੀ ਹੁਣ ਸ਼ਰਾਬ ਦੀ ਵਿਕਰੀ ਹੋਵੇਗੀ। ਸ਼ਰਤ ਸਿਰਫ ਇਹ ਹੈ ਕਿ ਦੁਕਾਨਾਂ ’ਤੇ 3 ਕਰੋੜ ਰੁਪਏ ਤੋਂ ਸਾਲਾਨਾ ਜੀਐਸਟੀ ਰਿਟਰਨ ਹੋਣਾ ਚਾਹੀਦਾ ਹੈ। ਇਸ ਤੋਂ ਇਲਾਵਾ ਰਾਤ ਦੇ 12 ਵਜੇ ਤੱਕ ਸ਼ਰਾਬ ਨੂੰ ਵੇਚਿਆ ਜਾਵੇਗਾ। ਸ਼ਰਾਬ ਦੀਆਂ ਦੁਕਾਨਾਂ ਹੁਣ ਸੁੰਨਸਾਨ ਥਾਵਾਂ ’ਤੇ ਨਹੀਂ ਹੋਣਗੀਆਂ ਇਸੇ ਉਦੇਸ਼ ਦੇ ਚੱਲਦੇ ਇਹ ਫੈਸਲਾ ਲਿਆ ਗਿਆ ਹੈ।
ਪਿੰਡ ਪਲਸੋਰਾ ਵਿੱਚ ਸ਼ਰਾਬ ਦੀ ਦੁਕਾਨ ਸਭ ਤੋਂ ਮਹਿੰਗੀ
ਨਵੀਂ ਆਬਕਾਰੀ ਨੀਤੀ ਦੇ ਅਨੁਸਾਰ, ਪਿੰਡ ਪਲਸੋਰਾ ਵਿੱਚ ਸ਼ਰਾਬ ਦੀ ਦੁਕਾਨ ਨੂੰ ਸ਼ਹਿਰ ਵਿੱਚ ਸਭ ਤੋਂ ਮਹਿੰਗਾ ਰੱਖਿਆ ਗਿਆ ਹੈ। ਆਬਕਾਰੀ ਵਿਭਾਗ ਨੇ ਇਸਦੀ ਰਿਜ਼ਰਵ ਕੀਮਤ 11 ਕਰੋੜ 41 ਲੱਖ 9 ਹਜ਼ਾਰ 803 ਰੁਪਏ ਨਿਰਧਾਰਤ ਕੀਤੀ ਹੈ। ਇਸ ਦੌਰਾਨ, ਸੈਕਟਰ-41 ਮਾਰਕੀਟ ਵਿੱਚ ਸ਼ਰਾਬ ਦੀ ਦੁਕਾਨ ਸਭ ਤੋਂ ਸਸਤੀ ਹੈ, ਜਿਸਦੀ ਰਿਜ਼ਰਵ ਕੀਮਤ 1 ਕਰੋੜ 93 ਲੱਖ ਰੁਪਏ ਹੈ।
ਲਾਇਸੈਂਸ ਲਈ ਅਰਜ਼ੀ
ਨਵੀਂ ਨੀਤੀ ਦੇ ਤਹਿਤ, ਹੋਟਲ ਅਤੇ ਰੈਸਟੋਰੈਂਟ ਸੰਚਾਲਕ L-3, L-4, L-5, L-3A, L-4A, L-10A, ਅਤੇ L-10AA ਫਾਰਮਾਂ ਦੇ ਤਹਿਤ ਬਾਰ ਲਾਇਸੈਂਸ ਲਈ ਅਰਜ਼ੀ ਦੇ ਸਕਣਗੇ। ਹਾਲਾਂਕਿ, ਲਾਇਸੈਂਸ ਹੋਟਲ ਜਾਂ ਰੈਸਟੋਰੈਂਟ ਦੇ ਅਸਲ ਵਿੱਚ ਕੰਮ ਸ਼ੁਰੂ ਕਰਨ ਤੋਂ ਬਾਅਦ ਹੀ ਜਾਰੀ ਕੀਤਾ ਜਾਵੇਗਾ। L-3, L-4, ਅਤੇ L-5 ਲਾਇਸੈਂਸਧਾਰਕ ਆਪਣਾ ਬਾਰ ਲਾਇਸੈਂਸ ਪ੍ਰਾਪਤ ਕਰਨ ਤੋਂ 15 ਦਿਨਾਂ ਬਾਅਦ ਮਾਈਕ੍ਰੋ-ਬਰੂਅਰੀ ਲਾਇਸੈਂਸ ਲਈ ਅਪਲਾਈ ਕੀਤਾ ਜਾ ਸਕੇਗਾ।
ਅਲਕੋਹਲ ਮੀਟਰ ਸਹੂਲਤ ਲਾਜ਼ਮੀ
ਨਵੀਂ ਆਬਕਾਰੀ ਨੀਤੀ ਦੇ ਤਹਿਤ, ਸ਼ਰਾਬ ਪੀ ਕੇ ਗੱਡੀ ਚਲਾਉਣ ਦੀਆਂ ਘਟਨਾਵਾਂ ਨੂੰ ਰੋਕਣ ਲਈ, ਹੋਟਲਾਂ, ਬਾਰਾਂ, ਰੈਸਟੋਰੈਂਟਾਂ ਅਤੇ ਪੱਬਾਂ ਵਿੱਚ ਸ਼ਰਾਬ ਪਰੋਸਣ ਵਾਲੇ ਸਾਰੇ ਲਾਇਸੈਂਸਧਾਰਕਾਂ ਲਈ ਅਲਕੋਹਲ ਮੀਟਰ ਸਹੂਲਤ ਲਾਜ਼ਮੀ ਕਰ ਦਿੱਤੀ ਗਈ ਹੈ।
ਇਹ ਵੀ ਪੜ੍ਹੋ : FIR Download Fee News : ਪੰਜਾਬ ਸਰਕਾਰ ਦਾ ਇੱਕ ਹੋਰ ਯੂ-ਟਰਨ ! FIR ਡਾਊਨਲੋਡ ਕਰਨ ’ਤੇ ਹੁਣ ਨਹੀਂ ਦੇਣੇ ਪੈਣਗੇ ਪੈਸੇ
- PTC NEWS
