ਕਣਕ ਦੀ ਖ਼ਰੀਦ ਲਈ ਪੰਜਾਬ 'ਚ ਤਿਆਰੀਆਂ ਬਣਿਆ ਕੰਟਰੋਲ ਰੂਮ, ਸਿਹਤ ਸੁਰੱਖਿਆ ਦੇ ਇੰਤਜ਼ਾਮ
ਚੰਡੀਗੜ੍ਹ - ਕਣਕ ਦੇ ਸੀਜ਼ਨ ਦੇ ਮੱਦੇਨਜ਼ਰ ਸੂਬਾ ਸਰਕਾਰ ਨੇ ਫ਼ਸਲ ਦੀ ਵਾਢੀ ਤੇ ਮੰਡੀਕਰਨ ਨਾਲ ਜੁੜੀਆਂ ਮੁਸ਼ਕਿਲਾਂ ਦੇ ਹੱਲ, ਫਸਲ ਦੀ ਚੁਕਾਈ ਅਤੇ ਲੋੜੀਂਦੇ ਤਾਲਮੇਲ ਵਾਸਤੇ ਮੰਡੀ ਬੋਰਡ ਦਾ ਇੱਕ 30 ਮੈਂਬਰੀ ਕੰਟਰੋਲ ਰੂਮ ਸਥਾਪਤ ਕੀਤਾ ਹੈ। COVID-19 ਨੂੰ ਦੇਖਦੇ ਹੋਏ ਸੀਜ਼ਨ ਦਾ ਕੰਮਕਾਜ ਨਿਰਵਿਘਨ ਚਲਾਉਣ ਲਈ ਬੇਮਿਸਾਲ ਸੁਰੱਖਿਆ ਉਪਾਅ ਅਪਣਾਉਂਦੇ ਹੋਏ, ਇਹ ਕੰਟਰੋਲ ਰੂਮ 15 ਅਪ੍ਰੈਲ ਤੋਂ ਆਪਣਾ ਕੰਮ-ਕਾਰ ਸ਼ੁਰੂ ਕਰ ਦੇਵੇਗਾ।
ਮੁੱਖ ਮੰਤਰੀ ਨੇ ਕਿਹਾ ਕਿ ਦਸੰਬਰ 2019 ਤੋਂ ਮਾਰਚ 2020 ਤੱਕ ਜੂਟ ਦੀਆਂ 3.4 ਲੱਖ ਪੰਡਾਂ ਮੰਗਵਾਉਣ ਲਈ ਮਾਲ ਪੱਤਰ ਭੇਜੇ ਗਏ ਸੀ ਅਤੇ ਇਨ੍ਹਾਂ ਬਾਬਤ ਕੋਲਕਾਤਾ ਦੇ ਜੂਟ ਕਮਿਸ਼ਨਰ ਦੇ ਖਾਤੇ ਵਿੱਚ ਲਗਭਗ 1 ਹਜ਼ਾਰ ਕਰੋੜ ਰੁਪਏ ਵੀ ਜਮ੍ਹਾਂ ਕਰਵਾਏ ਜਾ ਚੁੱਕੇ ਹਨ। ਮਿਲੀ ਜਾਣਕਾਰੀ ਅਨੁਸਾਰ 3.4 ਲੱਖ ਪੰਡਾਂ ਵਿੱਚੋਂ 2.46 ਲੱਖ ਦਾ ਨਿਰੀਖਣ ਹੋ ਚੁੱਕਿਆ ਹੈ ਅਤੇ ਹੁਣ ਤੱਕ 2.30 ਲੱਖ ਪੰਡਾਂ ਉੱਥੋਂ ਭੇਜੀਆਂ ਜਾ ਚੁੱਕੀਆਂ ਹਨ। ਮਿੱਲਾਂ ਵਿੱਚ 10,000 ਪੰਡਾਂ ਜਾਂਚ ਲਈ ਤਿਆਰ ਹਨ, ਪਰ ਦੇਸ਼ ਵਿਆਪੀ ਤਾਲ਼ਾਬੰਦੀ ਕਰਕੇ ਇਨ੍ਹਾਂ ਦੀ ਪੰਜਾਬ ਪਹੁੰਚ ਵਿੱਚ ਵਿਘਨ ਪਿਆ।
ਉਨ੍ਹਾਂ ਖੁਰਾਕ ਤੇ ਖੇਤੀਬਾੜੀ ਵਿਭਾਗਾਂ ਨੂੰ ਮੰਡੀਆਂ ਅਤੇ ਖਰੀਦ ਕੇਂਦਰਾਂ ਲਈ ਮਿਆਰੀ ਕਾਰਜ ਪ੍ਰਣਾਲੀਆਂ ਨਾਲ ਅਪਨਾਉਣ ਦੇ ਹੁਕਮ ਦਿੱਤੇ। ਉਨ੍ਹਾਂ ਵਿਭਾਗਾਂ ਨੂੰ ਖਰੀਦ ਕੇਂਦਰਾਂ ਦੀ ਗਿਣਤੀ 3,761 ਤੋਂ ਵਧਾ ਕੇ 4000 ਕਰਨ ਦੇ ਵੀ ਨਿਰਦੇਸ਼ ਦਿੱਤੇ।
