Kurukshetra Firing News : ਕੁਰੂਕਸ਼ੇਤਰ ’ਚ ਕਾਲਜ ਚੇਅਰਮੈਨ ਦੇ ਘਰ 'ਤੇ ਨਕਾਬਪੋਸ਼ਾਂ ਵੱਲੋਂ ਫਾਈਰਿੰਗ, ਇਲਾਕੇ ’ਚ ਫੈਲੀ ਦਹਿਸ਼ਤ
Kurukshetra Firing News : ਕੁਰੂਕਸ਼ੇਤਰ ਦੇ ਲਾਡਵਾ ’ਚ ਬੀਤੀ ਦੇਰ ਰਾਤ ਇੱਕ ਮੋਟਰਸਾਈਕਲ 'ਤੇ ਸਵਾਰ ਦੋ ਨਕਾਬਪੋਸ਼ ਵਿਅਕਤੀ ਇੱਕ ਕਾਲਜ ਸੰਚਾਲਕ ਦੇ ਘਰ ’ਤੇ ਤਾਬੜਤੋੜ ਫਾਇਰਿੰਗ ਕੀਤੀ। ਇਸ ਵਾਰਦਾਤ ਮਗਰੋਂ ਹਮਲਾਵਰ ਫਰਾਰ ਹੋ ਗਏ। ਮਿਲੀ ਜਾਣਕਾਰੀ ਮੁਤਾਬਿਕ ਹਮਲਾਵਰਾਂ ਨੇ ਲਗਭਗ 18 ਰਾਊਂਡ ਫਾਇਰ ਕੀਤੇ। ਗਣੀਮਤ ਇਹ ਰਹੀ ਕਿ ਗੋਲੀਬਾਰੀ ਦੇ ਸਮੇਂ ਪਰਿਵਾਰ ਮੌਜੂਦ ਨਹੀਂ ਸੀ। ਉਨ੍ਹਾਂ ਦਾ ਸਿਰਫ਼ ਇੱਕ ਨੌਕਰ ਸੁੱਤਾ ਪਿਆ ਸੀ। ਹਮਲਾ ਕਰਨ ਤੋਂ ਬਾਅਦ, ਹਮਲਾਵਰ ਮੌਕੇ ਤੋਂ ਭੱਜ ਗਏ।
ਘਟਨਾ ਦੀ ਸੂਚਨਾ ਮਿਲਦੇ ਹੀ ਡੀਐਸਪੀ ਨਿਰਮਲ ਸਿੰਘ, ਐਸਐਚਓ ਗੁਰਨਾਮ ਸਿੰਘ ਅਤੇ ਸੀਆਈਏ ਟੀਮਾਂ ਮੌਕੇ 'ਤੇ ਪਹੁੰਚੀਆਂ ਅਤੇ ਕਾਰਵਾਈ ਸ਼ੁਰੂ ਕਰ ਦਿੱਤੀ। ਮੋਟਰਸਾਈਕਲ 'ਤੇ ਸਵਾਰ ਦੋ ਬਦਮਾਸ਼ਾਂ ਨੇ ਦੇਵੀ ਮੰਦਰ ਦੇ ਸਾਹਮਣੇ ਅਗਰਵਾਲ ਕਲੋਨੀ ਵਿੱਚ ਰਜਨੀਸ਼ ਬਾਂਸਲ ਦੇ ਘਰ 'ਤੇ ਗੋਲੀਆਂ ਚਲਾ ਦਿੱਤੀਆਂ। ਰਜਨੀਸ਼ ਬਾਂਸਲ ਹਿਮਾਚਲ ਪ੍ਰਦੇਸ਼ ਦੇ ਕਾਲਾ ਅੰਬ ਵਿੱਚ ਹਿਮਾਲੀਅਨ ਗਰੁੱਪ ਨਾਮਕ ਇੱਕ ਕਾਲਜ ਦੇ ਮਾਲਕ ਹਨ।
ਰਿਪੋਰਟਾਂ ਅਨੁਸਾਰ ਰਜਨੀਸ਼ ਬਾਂਸਲ ਦਾ ਪਰਿਵਾਰ ਚੰਡੀਗੜ੍ਹ ਵਿੱਚ ਰਹਿੰਦਾ ਹੈ ਅਤੇ ਘਰ ਦੀ ਦੇਖਰੇਖ ਦੇ ਲਈ ਨੌਕਰ ਓਮ ਪ੍ਰਕਾਸ਼ ਨੂੰ ਰੱਖਿਆ ਹੋਇਆ ਹੈ। ਓਮ ਪ੍ਰਕਾਸ਼ ਰਾਤ 12:30 ਵਜੇ ਦੇ ਕਰੀਬ ਘਰ ਵਿੱਚ ਸੀ। ਮੋਟਰਸਾਈਕਲ 'ਤੇ ਸਵਾਰ ਦੋ ਬਦਮਾਸ਼ਾਂ ਨੇ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਨਾਲ ਖਿੜਕੀਆਂ ਦੇ ਸ਼ੀਸ਼ੇ ਟੁੱਟ ਗਏ। ਡਰ ਦੇ ਚੱਲਦੇ ਓਮ ਪ੍ਰਕਾਸ਼ ਬਾਹਰ ਨਹੀਂ ਆਇਆ।
ਦੱਸ ਦਈਏ ਕਿ ਘਟਨਾ ਤੋਂ ਬਾਅਦ ਉਸਨੇ ਤੁਰੰਤ ਆਪਣੇ ਪਰਿਵਾਰ ਅਤੇ ਪੁਲਿਸ ਨੂੰ ਸੂਚਿਤ ਕੀਤਾ। ਪੁਲਿਸ ਮੌਕੇ 'ਤੇ ਪਹੁੰਚੀ ਅਤੇ ਜਾਂਚ ਸ਼ੁਰੂ ਕਰ ਦਿੱਤੀ। ਪੁਲਿਸ ਨੂੰ ਘਟਨਾ ਸਥਾਨ ਤੋਂ ਕਈ ਖੋਲ ਬਰਾਮਦ ਹੋਏ। ਪੁਲਿਸ ਮੁਲਜ਼ਮਾਂ ਬਾਰੇ ਕਿਸੇ ਵੀ ਸੁਰਾਗ ਦਾ ਪਤਾ ਲਗਾਉਣ ਲਈ ਆਲੇ ਦੁਆਲੇ ਦੇ ਇਲਾਕੇ ਤੋਂ ਸੀਸੀਟੀਵੀ ਫੁਟੇਜ ਦੀ ਵੀ ਜਾਂਚ ਕਰ ਰਹੀ ਹੈ।
ਇਹ ਵੀ ਪੜ੍ਹੋ : Delimitation Bill : ਕੇਂਦਰ ਵੱਲੋਂ ਲੋਕ ਸਭਾ ਸੀਟਾਂ 'ਚ 50% ਵਾਧੇ ਦਾ ਪ੍ਰਸਤਾਵ, ਔਰਤਾਂ ਨੂੰ ਮਿਲਣਗੀਆਂ 272 ਰਾਖਵੀਆਂ ਸੀਟਾਂ
- PTC NEWS
